தங்கம் விலை பவுனுக்கு ரூ.40 ஆயிரத்தை கடந்து விற்பனை

சென்னை,

தங்கம் விலை இந்த ஆண்டு தொடக்கத்தில் இருந்து தொடர்ந்து ஏற்ற, இறக்கத்துடன் காணப்பட்டு வருகிறது. கடந்த மாத (மார்ச்) தொடக்கத்தில் விலை அதிகரித்து, 7-ந்தேதி ஒரு பவுன் ரூ.40 ஆயிரத்தை கடந்தது. அதன் பின்னர் விலை குறைய தொடங்கியது.

இந்தநிலையில் கடந்த 5-ந்தேதியில் இருந்து தங்கம் விலை ஏறுமுகத்தில் இருக்கிறது. அதன் தொடர்ச்சியாக நேற்றும் விலை அதிகரித்து காணப்பட்டது. நேற்று முன்தினம் ஒரு கிராம் தங்கம் ரூ.4 ஆயிரத்து 996-க்கும், ஒரு பவுன் ரூ.39 ஆயிரத்து 968-க்கும் விற்பனை ஆனது. நேற்று மாலை நேர நிலவரப்படி, கிராமுக்கு ரூ.16-ம், பவுனுக்கு ரூ.128-ம் உயர்ந்து, ஒரு கிராம் ரூ.5 ஆயிரத்து 12-க்கும், ஒரு பவுன் ரூ.40 ஆயிரத்து 96-க்கும் விற்பனை செய்யப்பட்டது.

அந்தவகையில் தங்கம் விலை 35 நாட்களுக்கு பிறகு, நேற்று ஒரு பவுன் ரூ.40 ஆயிரத்தை மீண்டும் கடந்து விற்பனை செய்யப்பட்டது. தங்கம் விலை கடந்த 10 நாட்களில் மட்டும் கிராமுக்கு ரூ.202-ம், பவுனுக்கு ரூ.1,616-ம் அதிகரித்துள்ளது. தங்கம் விலையை போலவே, வெள்ளி விலையும் நேற்று அதிகரித்திருந்தது. நேற்று கிராமுக்கு 40 காசும், கிலோவுக்கு ரூ.400-ம் உயர்ந்து, ஒரு கிராம் 74 ரூபாய் 60 காசுக்கும், ஒரு கிலோ ரூ.74 ஆயிரத்து 600-க்கும் விற்பனை ஆனது.