அறநிலையத்துறை அதிகாரிகளின் ஊதியத்தை ஏன் பிடித்தம் செய்யக்கூடாது? - ஐகோர்ட்டு கேள்வி

சென்னை,

தஞ்சாவூர் மாவட்டம் பந்தநல்லூர் மற்றும் ஈரோடு மாவட்டத்தில் உள்ள கோவில்களுக்கு சொந்தமான நிலங்களை ஆக்கிரமித்து அடுக்குமாடி கட்டிடங்கள், சொகுசு பங்களாக்கள், நூற்பாலை கட்டப்பட்டுள்ளதாக கூறி சென்னை ஐகோர்ட்டில், வெங்கட்ராமன், ராதாகிருஷ்ணன் ஆகியோர் தனித்தனியாக பொதுநல வழக்குகளை தொடர்ந்துள்ளனர்.

அந்த மனுக்களில், ‘‘கோவில்களின் குளம் தூர்வாருதல், கோவில் மண்டபம் புதுப்பித்தல் என்ற பெயரில் மணல் திருட்டு நடந்துள்ளது’’ என்றும் கூறியிருந்தனர்.

இந்த வழக்குகள் நீதிபதிகள் ஆர்.மகாதேவன், பி.டி.ஆதிகேசவலு ஆகியோர் முன்பு நேற்று விசாரணைக்கு வந்தது.

ஆக்கிரமிப்பு

அப்போது, இந்து சமய அறநிலையத்துறை சார்பில், “கோவில் நிலத்தை கணக்கிட்டு, ஆக்கிரமிப்பை கண்டறியும் நடவடிக்கை எடுக்கப்படுகிறது. ஈரோடு மாவட்டத்தில் உள்ள ஒரு கோவில் நிலங்களை மீட்க, கீழ்கோர்ட்டு பிறப்பித்த இடைக்கால உத்தரவால் நடவடிக்கை மேற்கொள்ள முடியவில்லை” என்று கூறப்பட்டது.

அப்போது குறுக்கிட்ட நீதிபதிகள், “கோவில் நிலங்களை ஆக்கிரமித்து பெரிய கட்டிடங்கள் கட்டப்படுகின்றன. இதுகுறித்து 3-வது நபர் ஐகோர்ட்டில் வழக்கு தொடர்ந்த பின்னர்தான், அந்த ஆக்கிரமிப்பு குறித்த விவரம் அறநிலையத்துறைக்கே தெரிய வருகிறது” என்று வருத்தம் தெரிவித்தனர்.

அதிகாரிகள் யார்?

பின்னர், “அறநிலையத்துறை ஆய்வாளர்கள் முறையாக செயல்படாததால்தான் இதுபோன்ற நிலை ஏற்படுகிறது. இவர்கள் அறநிலையத்துறை ஆணையரின் கவனத்துக்கு ஆக்கிரமிப்பு குறித்த தகவலை உடனுக்குடன் கொண்டு சென்று இருக்க வேண்டும். முறையாக செயல்படாத இந்த அதிகாரிகளின் ஓர் ஆண்டு ஊதியத்தை ஏன் பிடித்தம் செய்யக்கூடாது?, ஆக்கிரமிப்பு நிலத்தில் உள்ள கட்டிடங்களை உள்ளாட்சி அமைப்புகள் எப்படி அனுமதிக்கிறது? அதுவும் கோவில் நிலத்தில் கட்டிடம் கட்டி முடிக்கும்வரை காத்திருக்கும் அதிகாரிகள், அதன்பின்னர் நோட்டீஸ் அனுப்புகின்றனர்.

எனவே, இதுபோன்ற அதிகாரிகள் மீது கடும் நடவடிக்கை எடுத்தால்தான் சரியாக இருக்கும். கோவில் நிலத்தில் ஆக்கிரமிப்பு கட்டிடங்களை கட்டுவதற்கு அனுமதி வழங்கியது யார்? அந்த ஆக்கிரமிப்புகளை தடுக்காதவர்கள் யார்? என்ற அதிகாரிகளின் விவரங்களை அறிக்கையாக தாக்கல் செய்யவேண்டும்” என்று உத்தரவிட்டனர்.