வெவ்வேறு விபத்துகளில் 3 பேர் பலி

கோவை

கோவையில் வெவ்வேறு விபத்துகளில் 3 பேர் பலியானார்கள்.

லாரி மோதியது

கோவை புலியகுளம் வி.சி. காலனியை சேர்ந்தவர் மகேஷ்வரன்(வயது 46). அதே பகுதியை சேர்ந்த ஆட்டோ டிரைவர் ஜெயக்குமார்(38). இவர்கள் 2 பேரும், புலியகுளம் ரோடு ராமநாதபுரம் போலீஸ் நிலையம் அருகே நடந்து சென்று கொண்டிருந்தனர். அப்போது அந்த வழியாக வந்த லாரி கட்டுப்பாட்டை இழந்து மகேஷ்வரன் மற்றும் ஜெயக்குமார் மீது மோதியது. இதில் தூக்கி வீசப்பட்டு இருவரும் பலத்த காயமடைந்தனர். அந்த வழியாக சென்றவர்கள் இருவரையும் மீட்டு கோவை அரசு மருத்துவமனைக்கு அனுப்பி வைத்தனர். ஆனால் செல்லும் வழியிலேயே மகேஷ்வரன் பரிதாபமாக உயிரிழந்தார். மேலும் ஜெயக்குமாருக்கு சிகிச்சை அளிக்கப்பட்டு வருகிறது.

முதியவர்

இதேபோன்று காளப்பட்டி ரோடு நேரு நகரில் முதியவர் மற்றும் ஒரு இளம்பெண் சாலையை கடக்க முயன்றனர். அப்போது அந்த வழியாக வந்த மோட்டார் சைக்கிள் எதிர்பாராதவிதமாக அவர்கள் மீது மோதியது. இதில் பலத்த காயமடைந்த முதியவர் சம்பவ இடத்திலேயே பலியானார். காயமடைந்த இளம்பெண்ணை அக்கம்பக்கத்தினர் மீட்டு அருகே உள்ள தனியார் மருத்துவமனைக்கு அனுப்பி வைத்தனர். அங்கு அவருக்கு சிகிச்சை அளிக்கப்பட்டு வருகிறது.

போலீசார் நடத்திய விசாரணையில், விபத்தில் பலியானது காளப்பட்டி கிழக்கு நேரு நகரை சேர்ந்த பெருமாள் சாமி(78) என்பதும், காயமடைந்தது தர்மபுரி அரூரை சேர்ந்த ஐ.டி. ஊழியர் ராஜலட்சுமி(26) என்பதும் தெரியவந்தது. தொடர்ந்து போலீசார் விசாரணை நடத்தி வருகின்றனர்.

விசாரணை

இது தவிர கோவை எல் அண்டு டி பைபாஸ் ரோட்டில் சுமார் 25 வயது மதிக்கத்தக்க வாலிபர் மோட்டார் சைக்கிளில் சென்று கொண்டிருந்தார். அவர் இருகூர் பாலம் அருகே சென்ற போது கட்டுப்பாட்டை இழந்த மோட்டார் சைக்கிள் தாறுமாறாக ஓடி ரெயில்வே பாலத்தின் சுவரில் மோதியது. இதில் அவருக்கு தலையில் பலத்த காயம் ஏற்பட்டது. இதனால் சம்பவ இடத்திேலயே அவர் இறந்து போனார். இதுகுறித்து போக்குவரத்து புலனாய்வு பிரிவு போலீசார் வழக்குப்பதிவு செய்து விசாரணை நடத்தி வருகிறார்கள்.