போதை ஊசி, மாத்திரைகளுடன் 4 வாலிபர்கள் கைது

திண்டிவனம்

ரகசிய தகவல்

திண்டிவனம்பகுதியில் இளைஞர்கள் போதை பொருட்களை அதிக அளவில் பயன்படுத்துவதாக போலீசாருக்கு தகவல் கிடைத்தது. இதையடுத்து போதை பொருட்களை வினியோகம் செய்யும் நபர்களை போலீசார் தீவிரமாக கண்காணித்து வந்தனர். இந்த நிலையில் திண்டிவனம் போலீஸ் சப்-இன்ஸ்பெக்டர் ஆனந்த ராசன் தலைமையிலான போலீசார் தீர்த்தகுளம் பகுதியில் தீவிர ரோந்து பணியில் ஈடுபட்டிருந்தனர். அப்போது அங்கே சந்தேகத்துக்கிடமாக நின்று கொண்டிருந்த 4 பேரை பிடித்து சோதனை செய்தனர்.

போதை ஊசி, மாத்திரைகள்

அப்போது அவர்கள் வைத்திருந்த பையில் கஞ்சா, போதை மருந்துகள், போதை மாத்திரைகள், சிரஞ்சுகள் ஆகியவை இருந்ததை கண்டுபிடித்தனர். இதையடுத்து அவர்களை போலீஸ் நிலையத்துக்கு அழைத்து சென்று போலீசார் விசாரணை நடத்தினர்.

விசாரணையில் அவர்கள் திண்டிவனம் வசந்தபுரம் அன்புநகர் பகுதியை சேர்ந்த சதாம் உசேன்(வயது 31), ரோஷணை பங்களா தெருவை சேர்ந்த சூர்யா(22), பாட்டை மதார் சாகிப்தெருவை சேர்ந்த சிவா என்கிற ராஜசேகர்(26), கிடங்கல்- 2 எம்.ஜி.ஆர்.தெருவை சேர்ந்த ஷியாம்(29) என்பதும், போதை ஊசி, மாத்திரைகளை வினியோகம் செய்ய இருந்ததும் தெரிய வந்தது.

தீவிர விசாரணை

இதையடுத்து அவர்கள் 4 பேரையும் கைது செய்த போலீசார் அவர்களிடம் இருந்த போதை ஊசி, மருந்து, மாத்திரைகள் ஆகியவற்றை பறிமுதல்செய்தனர். மேலும் இவா்கள் எங்கிருந்து போதை ஊசி, மருந்து, மாத்திரைகளை வாங்கி யார் யாருக்கெல்லாம் வினியோகம் செய்தார்கள், பள்ளி, கல்லூரி மாணவர்களுக்கு வினியோகம் செய்தார்களா? என்பது குறித்து தீவிர விசாரணை நடத்தி வருகிறார்கள். இந்த சம்பவம் திண்டிவனம் பகுதியில் பரபரப்பை ஏற்படுத்தியுள்ளது.