கார் மீது அரசு பஸ் மோதி ஒரே குடும்பத்தை சேர்ந்த 5 பேர் படுகாயம்

திருவிடைமருதூர்:

நாச்சியார்கோவில் அருகே கார் மீது அரசு பஸ் மோதிய விபத்தில் ஒரே குடும்பத்தை சேர்ந்த 5 பேர் படுகாயம் அடைந்தனர்.

அரசு பஸ் மோதியது

புதுச்சேரி மாநிலம் இந்திரா நகர் அண்ணா வீதியை சேர்ந்தவர் சுப்ரமணியன். இவருடைய மகன் மோகன்ராஜ் (வயது33) மற்றும் அவரது சகோதரர் சுந்தர்ராஜன் (47), இவருடைய மனைவி வாசுமதி (41), இவர்களது மகன்கள் கவியரசன் (17), புவனேஸ்வரன் (16) ஆகியோர் புதுச்சேரியில் இருந்து திருவாரூர் மாவட்டம் நன்னிலத்துககு வந்துள்ளனர். பின்னா அவர்கள் நன்னிலத்தில் இருந்து தஞ்சை அருகே கும்பகோணம் நோக்கி காரில் வந்து கொண்டிருந்தனர்.

நாச்சியார்கோவிலை அடுத்த கூகூர் அருகே வந்த போது கும்பகோணத்தில் இருந்து நன்னிலம் நோக்கி சென்ற அரசு பஸ் எதிர்பாராதவிதமாக கார் மீது மோதியது.

5 பேர் படுகாயம்

இந்த விபத்தில் காரில் சென்ற மோகன்ராஜ், சுந்தர்ராஜன், வாசுமதி, கவியரசன், புவனேஸ்வரன் ஆகிய 5 பேரும் படுகாயம் அடைந்தனர். உடனடியாக அக்கம், பக்கத்தினர் படுகாயம் அடைந்தவர்களை மீட்டு சிகிச்சைக்காக கும்பகோணம் அரசு ஆஸ்பத்திரிக்கு அனுப்பி வைத்தனர். இதுகுறித்து நாச்சியார்கோவில் போலீசார் வழக்குப்பதிவு செய்து விசாரணை நடத்தி வருகின்றனர்.