வாலிபரை ஓரினசேர்க்கையில் ஈடுபட வைத்து வீடியோ எடுத்து மிரட்டிய 6 பேர் கைது

மணப்பாறையில் வாலிபரை மிரட்டி ஓரினசேர்க்கையில் ஈடுபட வைத்து வீடியோ எடுத்து மிரட்டிய 6 பேர் கைது செய்யப்பட்டனர்.

ஓரினசேர்க்கை

மணப்பாறை அருகே உள்ள ஒரு கிராமத்தை சேர்ந்த 27 வயது வாலிபர் ஒருவர் மணப்பாறைக்கு தனியார் பஸ்சில் வந்து கொண்டிருந்தார். அதே பஸ்சில் மணப்பாறை வண்டிப்பேட்டை தெருவைச் சேர்ந்த அறிவழகன் (27) என்பவரும் சென்றுள்ளார். இந்நிலையில் அறிவழகன் தன் நண்பர்களுக்கு போன் செய்து பஸ்சில் வந்த 27 வயது வாலிபர் தன்னிடம் பிரச்சினை செய்து விட்டதாகவும் அனைவரும் மணப்பாறை மதுரை ரோட்டில் உள்ள ஒரு குளத்திற்கு வரும் படி கூறி உள்ளார்.

அதன்படி 5 பேர் அங்கு வரவே பஸ்சில் இருந்து வாலிபரை பிடித்து அழைத்துக் கொண்டு குளத்தில் வைத்து 24 வயது வாலிபர் ஒருவருடன் ஓரினசேர்க்கையில் ஈடுபடுமாறு மிரட்டி உள்ளனர்.

பின்னர் ஓரினசேர்க்கையில் ஈடுபட்டதை வீடியோவாக பதிவு செய்து அதை சமூக வலைதளங்களில் பதிவு செய்து விடுவோம் என்று கூறி மிரட்டி ரூ.75 ஆயிரம் கேட்டுள்ளனர். இதனையடுத்து 27 வயது வாலிபர் அவர்களுக்கு பணத்தை கொடுத்துவிட்டு தப்பி வந்து விட்டார்.

6 பேர் கைது

பின்னர் அவர் இது குறித்து மணப்பாறை போலீசில் புகார் செய்தார். அதன் பேரில் மணப்பாறை போலீசார் வழக்கு ப்பதிவு செய்து 27 வயது வாலிபரை ஓரினசேர்க்கையில் ஈடுபட வைத்து மிரட்டிய அறிவழகன், முகமது ரியாஸ், மஸ்தான் தெருவை சேர்ந்த அருண் குமார் (22), லட்சுமி நாராயணன் நகரை சேர்ந்த லியோ பிளாய்டு (25), மணப்பாறைபட்டியை சேர்ந்த மயில் என்ற செந்தில் குமார் (25), நேருஜி நகரை சேர்ந்த யுவராஜ் (26) ஆகிய 6 பேரை கைது செய்தனர். இதில் கைதாகி உள்ள முகமது ரியாஸ் மற்றும் மயில் என்ற செந்தில் குமார் ஆகிய இருவரும் ஏற்கனவே பள்ளி மாணவிகள் இருவரை பாலியல் வன்புறுத்தல் செய்து போக்சோ சட்டத்தில் கைதானது குறிப்பிடத்தக்கது.