கோவையில் வ.உ.சி.க்கு 7 அடியில் வெண்கல சிலை

கோவை,

கோவையில் வ.உ.சி.க்கு 7 அடியில் வெண்கல சிலைஅமைப்பதற்கான கட்டுமான பணிகள் தொடங்கியது.

வ.உ.சி.க்கு சிலை

நமது நாட்டின் சுதந்திர போராட்டத்தில் வ.உ.சி.க்கு முக்கிய பங்கு உண்டு. அவரை கைது செய்த ஆங்கிலேயர் கோவை சிறையில் அடைத்து செக்கு இழுக்க வைத்தனர். இதை தொடர்ந்து அவர் இழுத்த செக்கின் மாதிரி கோவை மத்திய சிறையில் வைக்கப்பட்டு உள்ளது.

மேலும் வ.உ.சிதம்பரனார் நமது நாட்டுக்கு ஆற்றிய பங்கை அனைவரும் தெரிந்து கொள்ளும் வகையில் கோவையில் உள்ள வ.உ.சி. பூங்காவில் வ.உ.சி. சிலை அமைக்கப்படும் என்று அறிவிக்கப்பட்டது. அத்துடன் அதற்கான இடமும் தேர்வு செய்யப்பட்டது.

பணி தொடங்கியது

இந்த நிலையில் வ.உ.சி. சிலை அமைக்கும் இடம் மாற்றப்பட்டு வ.உ.சி. மைதானத்தில் 50 அடி நீளம், 45 அடி அகலம் கொண்ட 5 சென்ட் இடம் ஒதுக்கப்பட்டது. அங்கு தற்போது அவருக்கு சிலை அமைக்கும் பணி தொடங்கப்பட்டு உள்ளது.

இதற்காக இடம் தேர்வு செய்யப்பட்டு உள்ள பகுதியில் பொக்லைன் எந்திரம் மூலம் குழி தோண்டப்பட்டு அஸ்திவாரம் போடும் பணி தீவிரமாக நடந்து வருகிறது. பொதுப்பணித்துறை அதிகாரிகள் மேற்பார்வையில் தொழிலாளர்கள் வேகமாக பணியை செய்து வருகிறார்கள். இது குறித்து பொதுப்பணித்துறை அதிகாரிகள் கூறியதாவது:-

ரூ.40 லட்சம்

கோவை வ.உ.சி. மைதானத்தில் ரூ.40 லட்சத்தில் பீடம் அமைத்து அதில் வ.உ.சிதம்பரனாருக்கு 7 அடி உயரத்தில் வெண்கல சிலை அமைக்கப்படுகிறது. இதற்காக சிலை தயாரிக்கும் பணி சென்னையில் நடந்து வருகிறது. கோவை மைதானத்தில் சிலையை பீடம் அமைப்பதற்கான கட்டுமான பணி வேகமாக நடந்து வருகிறது.அங்கு வ.உ.சிதம்பரனார் குறித்த வரலாற்று தகவலும் இடம்பெறும். இந்த பணிகள் விரைவில் முடிக்கப்பட்டு சிலை, நிறுவப்பட்டு பின்னர் திறக்கப்படும்.

இவ்வாறு அவர்கள் கூறினார்கள்.