தமிழகத்துக்கு கடத்த முயன்ற 8½ கிலோ தங்கம்

ராமேசுவரம்,

படகில் தமிழகத்துக்கு கடத்தி வர முயன்ற 8½ கிலோ தங்கத்ைத இலங்கை கடற்படை கைப்பற்றியது. மேலும் படகை பறிமுதல் செய்ததோடு அதில் இருந்த 2 பேரிடம் விசாரணை நடந்து வருகிறது.

தங்கம் கடத்தல்

ராமேசுவரம், தனுஷ்கோடி கடல் பகுதி வழியாக இலங்கைக்கு கடல் அட்டை, பீடி இலை, கஞ்சா உள்ளிட்ட பல்வேறு பொருட்கள் கடத்தல்காரர்கள் மூலம் கடத்தப்படுகின்றன. இலங்கையில் இருந்தும் கடத்தல்காரர்கள் மூலம் தங்கக்கட்டிகள் கடத்தலும் நடக்கிறது.

இதனிடையே இலங்கை கல்பட்டி கடல் பகுதியில் இருந்து தமிழகத்துக்கு தங்கக்கட்டிகளும், தங்கச்சங்கிலிகளும் கடத்தப்பட உள்ளதாக கிடைத்த தகவலை தொடர்ந்து, இலங்கை கடற்படையினர் நேற்று முன்தினம் இரவு கல்பட்டி கடல் பகுதியில் தீவிர ரோந்து பணியில் ஈடுபட்டு இருந்தனர்.

8½ கிலோ தங்கம் பறிமுதல்

அப்போது சந்தேகப்படும்படியாக சென்று கொண்டிருந்த பிளாஸ்டிக் படகு ஒன்றை நிறுத்தி சோதனை செய்தனர். அந்த படகில் மறைத்து வைக்கப்பட்டிருந்த 4 பார்சல்களை பிரித்து பார்த்த போது அதில் தங்கக்கட்டிகள், தங்கச்சங்கிலிகள் இருந்தது தெரியவந்தது.

தொடர்ந்து படகில் இருந்த 8 கிலோ 450 கிராம் தங்கத்தை பறிமுதல் செய்த இலங்கை கடற்படையினர், அதை தமிழகத்தை நோக்கி கடத்தி வந்த படகையும், அதில் இருந்த இலங்கையை சேர்ந்த 2 பேரையும் பிடித்து தீவிர விசாரணை நடத்தி வருகின்றனர்.