ராட்சத எந்திரங்கள் ஏற்றிச் சென்ற டிரைலர் லாரியில் தீவிபத்து

ராட்சத எந்திரங்கள்

ராணிப்பேட்டை சிப்காட்டில் இருந்து தொழிற்சாலைகளுக்கு பயன்படுத்தப்படும் எந்திரங்கள் தயாரிப்பதற்கான ஜெனரேட்டர் வகை கொண்ட தளவாட ராட்சத எந்திரங்களை ஏற்றிக்கொண்டு ஒரு டிரைலர் லாரி ஒன்று புனேவுக்கு நேற்று சென்றது.

சென்னை- பெங்களூரு தேசிய நெடுஞ்சாலையில் வேலூர் அருகே பொய்கையில் சென்று கொண்டிருந்த போது திடீரென லாரியில் இருந்த ஒரு ஜெனரேட்டரில் இருந்து கரும்புகை வந்தது. இதனை வந்த வழியாக சென்ற வாகன ஓட்டிகள் பார்த்தனர். அவர்கள் அந்த லாரி டிரைவரிடம் இதுகுறித்து தெரிவித்தனர். இதையடுத்து அவர் லாரியை சாலையோரம் நிறுத்தினார்.

போக்குவரத்து பாதிப்பு

அப்போது அவர் கொண்டு சென்ற 4 ராட்சத எந்திரங்களில் கடைசியில் இருந்த ஒரு எந்திரத்தில் தீ பிடித்து, அதில் இருந்து அதிகமான கரும்புகை வெளியேறியது. இதை அவர் மற்றும் அக்கம்பக்கத்தில் உள்ளவர்கள் அணைக்க முயன்றனர். எனினும் அவர்களால் முடியவில்லை. இதுகுறித்து வேலூர் தீயணைப்பு நிலையத்துக்கு தகவல் தெரிவிக்கப்பட்டது. அதன்பேரில் தீயணைப்பு வீரர்கள் சம்பவ இடத்துக்கு விரைந்தனர்.

அவர்கள் தண்ணீரை பீய்ச்சி அடித்து தீயை அணைத்தனர். எனினும் ஒரு எந்திரம் மட்டும் தீயில் எரிந்து சேதமடைந்திருந்தது. இந்த விபத்து காரணமாக தேசிய நெடுஞ்சாலையில் போக்குவரத்து பாதிக்கப்பட்டது.

தகவல் அறிந்ததும் விரிஞ்சிபுரம் போலீசார் சம்பவ இடத்துக்கு சென்று போக்குவரத்தை ஒழுங்குபடுத்தினர். மேலும் லாரியில் ஏற்பட்ட தீ விபத்து குறித்தும் விசாரணை நடத்தி வருகின்றனர்.

இந்த சம்பவம் அந்த பகுதியில் பரபரப்பை ஏற்படுத்தியது.