மங்களமேடு அருகே டிராக்டர் மோதி சிறுமி பலி

பெரம்பலூர் மாவட்டம் குன்னம் வட்டம் மங்களமேடு அடுத்துள்ள எழுமூர் தெற்கு தெருவை சேர்ந்தவர் தங்கராசு. இவருடைய மனைவி தனலட்சுமி (வயது 35). இவர்களது மகள் திவ்யா (11). இந்தநிலையில் தனலட்சுமி தனது மகளுடன் நேற்று காலை 11 மணியளவில் தனக்கு சொந்தமான வயலுக்கு சைக்கிளில் சென்று கொண்டிருந்தார். எழுமூர்-ஆய்க்குடி சாலையில் சென்றபோது அந்த வழியாக சென்ற டிராக்டரின் பின்புறம் சைக்கிள் மோதியது. இந்த விபத்தில் தாயும், மகளும் படுகாயம் அடைந்தனர். இதையடுத்து அந்த வழியாக சென்ற வாகன ஓட்டிகள் அவர்கள் 2 பேரையும் மீட்டு திருச்சியில் உள்ள தனியார் மருத்துவமனைக்கு கொண்டு சென்றனர். ஆனால் செல்லும் வழியிலேயே திவ்யா பரிதாபமாக இறந்தார். தனலட்சுமிக்கு டாக்டர்கள் தீவிர சிகிச்சை அளித்து வருகிறார்கள். இந்த விபத்து குறித்து மங்களமேடு போலீசார் வழக்குப்பதிவு செய்து விசாரணை நடத்தி வருகிறார்கள்.