உளுந்தூர்பேட்டை,

கள்ளக்குறிச்சி மாவட்டம் உளுந்தூர்பேட்டை நகராட்சிக்குட்பட்ட முனுசாமி நகர் வழியாக நேற்று லாரி ஒன்று சென்று கொண்டிருந்தது. அப்போது அந்த லாரி டிரைவரின் கட்டுப்பாட்டை இழந்து திடீரென தெருவோரம் இருந்த 2 மின்கம்பங்கள் மீது அடுத்தடுத்து மோதி நின்றது. இதில் 2 மின்கம்பங்களும் முறிந்து விழுந்தது. அப்போது ஒரு கம்பம் அப்பகுதியில் உள்ள ஒரு வீட்டின் மீது விழுந்து விட்டது. இந்த விபத்தில் வீட்டில் இருந்தவர்கள் அதிர்ஷ்டவசமாக காயமின்றி தப்பினர். மேலும் இந்த விபத்து காரணமாக அப்பகுதியில் உள்ள 100-க்கும் மேற்பட்ட வீடுகளில் மின்சாரம் துண்டிக்கப்பட்டது. இதுபற்றி தகவல் அறிந்ததும் மின்வாரிய அதிகாரிகள் மற்றும் பணியாளர்கள் விரைந்து வந்து முறிந்த மின்கம்பங்களை அகற்றி விட்டு, புதிய கம்பங்களை நட்டு மின்வினியோகம் செய்ய நடவடிக்கை எடுத்தனர். இந்த விபத்தால் அங்கு சுமார் 6 மணி நேரம் மின்சாரம் துண்டிக்கப்பட்டதால் அப்பகுதி மக்கள் கடும் அவதியடைந்தனர். இந்த சம்பவத்தால் அங்கு பெரும் பரபரப்பு ஏற்பட்டது.