சாலையை கடக்க முயன்றவர் அரசு பஸ் மோதி பலி

கொள்ளிடம் டோல்கேட், செப்.19-

திருச்சி உறையூர் பகுதியை சேர்ந்த ராஜ்குமார் (வயது 37). இவர் நேற்று முன்தினம் இரவு லால்குடியில் உள்ள தனது மனைவியை பார்த்துவிட்டு பஸ்சில் ஏறி நெ.1 டோல்கேட்டில் இறங்கியுள்ளார். பின்னர் இயற்கை உபாதை கழிப்பதற்காக கொள்ளிடம் ஆற்று பகுதிக்கு சென்ற அவர் சென்னை - திருச்சி தேசிய நெடுஞ்சாலையை கடக்க முயன்றார். அப்போது திருச்சி நோக்கி வந்த அரசு பஸ் ராஜ்குமார் மீது மோதியது. இதனைக் கண்ட அக்கம் பக்கத்தினர் அவரை மீட்டு சிகிச்சைக்காக ஸ்ரீரங்கம் அரசு மருத்துவமனைக்கு அனுப்பி வைத்தனர். அங்கு அவரை பரிசோதித்த மருத்துவர்கள் ராஜ்குமார் ஏற்கனவே இறந்துவிட்டதாக தெரிவித்தனர். இதுகுறித்து கொள்ளிடம் போலீசார் வழக்குப்பதிவு செய்து விசாரணை நடத்தி வருகின்றனர்.