சாலையோரம் இறந்து கிடந்த வாலிபர்

மணப்பாறை:

மணப்பாறையை அடுத்த வடுகபட்டி அருகே சாலையோரம் உள்ள புளியமரத்தின் அருகே வாலிபர் ஒருவர் நேற்று காலை இறந்து கிடந்தார். இதை அந்த வழியாக வந்தவர்கள் பார்த்து மணப்பாறை போலீசாருக்கு தகவல் கொடுத்தனர். அதன்பேரில் மணப்பாறை போலீசார் சம்பவ இடத்திற்கு சென்று விசாரணை நடத்தியபோது இறந்தவர் கரும கவுண்டம்பட்டியை சேர்ந்த அசோக்குமார்(வயது 27) என்பதும், மணப்பாறையில் உள்ள ஒரு மொபைல் ஷோரூமில் நிதி நிறுவன பிரிவில் பணியாற்றி வந்ததும் தெரியவந்தது. மோட்டார் சைக்கிளில் மணப்பாறையில் இருந்து துவரங்குறிச்சி சாலையில் சென்ற அவர் தலையில் காயமடைந்த நிலையில் இறந்து கிடந்தது தெரியவந்தது. இந்த சம்பவம் தொடர்பாக மணப்பாறை போலீசார் வழக்குப்பதிவு செய்து, அவரது சாவுக்கான காரணம் குறித்து விசாரணை நடத்தி வருகின்றனர்.