காதல் தகராறில் வாலிபருக்கு பாட்டில் குத்து

சிங்காநல்லூர்

கோவை சிங்காநல்லூரில் காதல் தகராறில் வாலிபரை கல்லூரி மாணவர் பாட்டிலால் குத்தினார். அவரை போலீசார் கைது செய்தனர்.

இதுகுறித்து போலீஸ் தரப்பில் கூறப்பட்டதாவது:-

இளம்பெண்ணுடன் காதல்

தென்காசி மாவட்டம் கடையநல்லூரை சேர்ந்தவர் 19 வயது வாலிபர் கோவை சிங்காநல்லூரில் தங்கி இருந்து தனியார் கல்லூரியில் படித்து வருகிறார். இவர் கோவையை சேர்ந்த இளம்பெண் ஒருவரை காதலித்து வந்ததாக கூறப்படுகிறது. இது தொடர்பாக அந்த இளம்பெண்ணின் அண்ணனுக்கும், கல்லூரி மாணவருக்கும் இடையே தகராறு ஏற்பட்டது.

இந்த நிலையில் கல்லூரி மாணவரை சிலர் மசக்காளிபாளையத்தில் உள்ள கல்லுக்குழி பகுதிக்கு அழைத்துச் சென்றனர். பின்னர் அவர்கள் அந்த இளம்பெண்ணை காதலிப்பதை கைவிடும்படி வலியுறுத்தினார்கள். இதனால் அவர்களுக்குள் தகராறு ஏற்பட்டது. இதில் ஒருவரை ஒருவர் தாக்கிக்கொண்டனர்.

வாலிபருக்கு பாட்டில் குத்து

அப்போது கல்லூரி மாணவர் அங்கு கிடந்த பாட்டிலை எடுத்து உடைத்து, இளம்பெண்ணின் நண்பரான 19 வயது வாலிபரை குத்தினார். இதில் காயம் அடைந்த அவரை சக நண்பர்கள் மீட்டு ஆஸ்பத்திரியில் சிகிச்சைக்காக அனுமதித்தனர்.

இதுகுறித்த புகாரின்பேரில் சிங்காநல்லூர் போலீசார் வழக்குப்பதிவு செய்து கல்லூரி மாணவரை கைது செய்தனர். அதுபோன்று கல்லூரி மாணவர் கொடுத்த புகாரின்பேரில் வாலிபர் மீது போலீசார் வழக்குப்பதிவு செய்து விசாரணை நடத்தி வருகிறார்கள்.