காதல் திருமணம்

ராணிப்பேட்டை மாவட்டம் அரக்கோணத்தை அடுத்த சித்தேரி ரெயில் நிலையம் பகுதியை சேர்ந்தவர் விக்கி என்ற விக்னேஷ் (வயது 24). இவரது மனைவி யாமினி. கடந்த 3 வருடங்களுக்கு முன்பு இருவரும் காதல் திருமணம் செய்து கொண்டனர். இந்த தம்பதியினருக்கு குழந்தை இல்லை. விக்னேஷ் தனது மனைவி யாமினியுடன் அதே பகுதியில் தனிக்குடித்தனம் நடத்தி வந்தார்.

மேலும் விக்னேஷ் ஸ்ரீபெரும்புதூரில் உள்ள தனியார் கம்பெனியில் கூலி தொழிலாளியாக வேலை செய்து வந்துள்ளார். இந்தநிலையில் நேற்று முன்தினம் இரவு விக்னேஷ் வீட்டை விட்டு வெளியே சென்றார். பின்னர் நீண்ட நேரம் ஆகியும் அவர் வீடு திரும்பவில்லை.

கழுத்தை அறுத்து கொலை

இதனால் அதிர்ச்சியடைந்த யாமினி மற்றும் உறவினர்கள் அவரை தேடினர். இந்த நிலையில் நேற்று காலை சித்தேரி ரெயில்வே கேட் அருகே உள்ள மாந்தோப்பு கிணற்றின் அருகே விக்னேஷ் கழுத்து அறுக்கப்பட்டு ரத்த வெள்ளத்தில் கொலை செய்யப்பட்டு கிடந்தார்.

இது குறித்து தகவல் அறிந்ததும் அரக்கோணம் தாலுகா போலீசார் சம்பவ இடத்துக்கு விரைந்து சென்று உடலை மீட்டு பிரேத பரிசோதனைக்காக வேலூர் அடுக்கம்பாறை அரசு மருத்துவமனைக்கு அனுப்பி வைத்தனர்.

சம்பவ இடத்திற்கு வந்த கூடுதல் போலீஸ் சூப்பிரண்டு விஸ்வேஸ்வரய்யா, துணை போலீஸ் சூப்பிரண்டு பிரபு ஆகியோர் விசாரணை மேற்கொண்டனர்.

மேலும் இதுகுறித்து தாலுகா போலீசார் வழக்குப் பதிவு செய்து விக்னேஷ் எதற்காக வீட்டிலிருந்து வெளியே சென்றார்?, அவரை கொலை செய்தவர்கள் யார்?, முன்விரோதம் ஏதேனும் உள்ளதா? என பல்வேறு கோணங்களில் விசாரணை நடத்தினர்.

மனைவி- கள்ளக்காதலன் கைது

இந்தநிலையில் போலீசார் சந்தேகத்தின் பேரில் விக்னேசின் உறவினரான தண்டலம் பகுதியை சேர்ந்த சதீஷ் (24). என்பவரை பிடித்து விசாரித்தனர். விசாரணையில் விக்னேஷ் மனைவி யாமினிக்கும், சதீசுக்கும் கள்ளத்தொடர்பு இருந்ததும், இதன் காரணமாக விக்னேசை, சதீஷ் கொலை செய்ததும் தெரியவந்தது.

மேலும் கொலையில் விக்னேஷ் மனைவிக்கும் தொடர்பு இருப்பதால் சதீஷ் மற்றும் யாமினியை போலீசார் கைது செய்தனர். தொடர்ந்து கள்ளக்காதலுக்கு இடையூறாக இருந்ததால் அவர் கொலைசெய்யப்பட்டாரா? என்பது குறித்து போலீசார் விசாரணை நடத்தி வருகின்றனர்.