பட்டா கத்தியை சுழற்றி வீடியோ வெளியிட்ட வாலிபர் கைது

மதுரை மதிச்சியத்தைச் சேர்ந்தவர் அஜித்குமார் (வயது 24). ரவுடியான, இவர் சமீபத்தில் வீடியோ ஒன்றை வெளியிட்டார். அதில் சினிமா பாடலுக்கு நடனம் ஆடும் அஜித்குமார் சட்டையில் இருந்து பட்டா கத்தியை எடுத்து மிரட்டுவது போல காட்சிகள் இடம் பெற்று இருந்தன. எனவே அவரை கைது செய்ய வேண்டும் என்று மாநகர போலீஸ் கமிஷனர் செந்தில்குமார் உத்தரவிட்டார். அதன்படி தல்லாகுளம் உதவி கமிஷனர் ஜெகன்நாதன் தலைமையில் தனிப்படை அமைக்கப்பட்டது. போலீஸ் விசாரணையில் அஜித்குமார் உடுமலைபேட்டையில் பதுங்கி இருப்பது தெரியவந்தது. உடனே தனிப்படை போலீசார் அங்கு சென்று அவரை கைது செய்தனர்.பிரபல ரவுடியான, அஜித்குமார் மீது கொலை முயற்சி, வழிப்பறி உள்பட 20-க்கும் மேற்பட்ட வழக்குகள் நிலுவையில் உள்ளன. மதுரை மாநகரில் மட்டும் 8 வழக்குகள் நிலுவையில் இருப்பதாக போலீசார் தெரிவித்தனர்.