விபத்தில் சிக்கிய மனைவியை பார்க்க வந்த தொழிலாளி லாரி மோதி பலி

உளுந்தூர்பேட்டை,

கள்ளக்குறிச்சி அருகே கோட்டகரை பொட்டியம் கிராமத்தை சேர்ந்தவர் சண்முகம் (வயது 45). இவர் தனது மனைவியுடன் சென்னையில் தங்கி கூலி வேலை பார்த்து வந்தார். சம்பவத்தன்று சண்முகத்தின் மனைவி தனது மகளை பார்ப்பதற்காக கள்ளக்குறிச்சிக்கு சென்ற போது விபத்தில் சிக்கினார். இதையடுத்து அவர் சிகிச்சைக்காக கள்ளக்குறிச்சி அரசு மருத்துவமனையில் அனுமதிக்கப்பட்டுள்ளார். இது பற்றி தகவல் அறிந்த சண்முகம் தனது மனைவியை பார்ப்பதற்காக சென்னையில் இருந்து மோட்டார் சைக்கிளில் கள்ளக்குறிச்சிக்கு புறப்பட்டார். உளுந்தூர்பேட்டை புறவழிச்சாலை பகுதியில் உள்ள சேந்தநாடு குறுக்கு சாலை வழியாக உளுந்தூர்பேட்டை நகருக்குள் செல்ல முயன்ற போது அந்த வழியாக வந்த லாரி ஒன்று எதிர்பாராதவிதமாக சண்முகம் மீது மோதியது. இந்த விபத்தில் பலத்த காயமடைந்த அவர் சம்பவ இடத்திலேயே பரிதாபமாக இறந்தார். இது குறித்த புகாரின் பேரில் உளுந்தூர்பேட்டை போலீசார் வழக்குப்பதிவு செய்து விசாரணை நடத்தி வருகின்றனர்.