சிங்காரப்பேட்டை அருகே கோழிப்பண்ணையில் திடீர் தீ விபத்து 4 ஆயிரம் கோழி குஞ்சுகள் தீயில் கருகின

ஊத்தங்கரை:

சிங்காரப்பேட்டை அருகே கோழிப்பண்ணையில் ஏற்பட்ட திடீர் தீ விபத்தில் 4 ஆயிரம் கோழி குஞ்சுகள் தீயில் கருகின.

கோழிப்பண்ணையில் தீ

கிருஷ்ணகிரி மாவட்டம் சிங்காரப்பேட்டை அருகே நார்சாம்பட்டி கிராமத்தை சேர்ந்தவர் ராஜசேகர். இவர் கோழி பண்ணை நடத்தி வருகிறார். இந்த பண்ணையில் வளர்ப்புக்காக சுமார் 4 ஆயிரம் கோழி குஞ்சுகளை கொண்டு வந்து வைத்து இருந்தார். நேற்று காலை மின்சாரம் துண்டிக்கப்பட்டு மீண்டும் மின்சாரம் வந்தது. அப்போது திடீரென கோழிப்பண்ணையில் இருந்து மின் ஒயர்கள் தீப்பற்றி எரிய தொடங்கியது. சிறிது நேரத்தில் கோழிப்பண்ணை முழுவதும் தீப்பிடித்து எரிந்தது. இதில் பண்ணையில் இருந்த 4 ஆயிரம் கோழி குஞ்சுகள், குடோன் மற்றும் கோழி தீவனங்கள் மளமளவென எரிந்தன.

விசாரணை

இந்த தீவிபத்து குறித்து அக்கம் பக்கத்தினர் ஊத்தங்கரை தீயணைப்பு நிலையத்திற்கு தகவல் தெரிவித்தனர். அதன்பேரில் தீயணைப்பு துறையினர் விரைந்து வந்து தண்ணீரை பீய்ச்சி அடித்து தீயை கட்டுக்குள் கொண்டு வந்தனர். இந்த தீ விபத்தில் கோழி குஞ்சுகள் மற்றும் ரூ.10 லட்சம் மதிப்பிலான பொருட்கள் சேதம் அடைந்ததாக கூறப்படுகிறது. தீ விபத்துக்கான காரணம் குறித்து விசாரணை நடத்தியபோது உயர் அழுத்த மின்சாரம் காரணமாக கோழிப்பண்ணையில் தீவிபத்து ஏற்பட்டது தெரியவந்தது. இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.