கிருஷ்ணகிரி மாவட்டத்தில் வெவ்வேறு விபத்துகளில் பெண் உள்பட 3 பேர் பலி

கிருஷ்ணகிரி மாவட்டத்தில் நடந்த வெவ்வேறு சாலை விபத்துகளில் பெண் உள்பட 3 பேர் பலியானார்கள்.

வாலிபர்

கிருஷ்ணகிரி பாரதியார் தெரு 2-வது கிராசை சேர்ந்தவர் ரியாஸ். இவருடைய மகன் ஷாயின்ஷா (வயது 21). இவர் நேற்று முன்தினம் மாலை சென்னை- கிருஷ்ணகிரி தேசிய நெடுஞ்சாலையில் புதிய மேம்பால சர்வீஸ் சாலை அருகில் தொன்னையன் கொட்டாய் பகுதியில் நடந்து சென்று கொண்டிருந்தார்.

அப்போது அந்த வழியாக சென்ற கன்டெய்னர் லாரி ஷாயின்ஷா மீது மோதியது. இதில் பலத்த காயம் அடைந்த அவர் சம்பவ இடத்திலேயே பலியானார். விபத்து குறித்து தகவல் அறிந்த கிருஷ்ணகிரி டவுன் போலீசார் சம்பவ இடத்திற்கு சென்று அவரது உடலை மீட்டு பிரேத பரிசோதனைக்காக கிருஷ்ணகிரி அரசு மருத்துவக்கல்லூரி மருத்துவமனைக்கு அனுப்பி வைத்து விசாரணை நடத்தி வருகின்றனர்.

பெண்

சூளகிரி தாலுகா மேலுமலை அருகே உள்ள செக்காலப்பள்ளியை சேர்ந்தவர் அழகேசன். இவருடைய மனைவி முனியம்மாள் (43). இவர் ஓசூர்- பெங்களூரு தேசிய நெடுஞ்சாலையில் ஓசூர் கரூஸ் வைசியா பேங்க் அருகில் கடந்த 30-ந் தேதி மாலை நடந்து சென்று கொண்டிருந்தார்.

அப்போது அந்த வழியாக மோட்டார் சைக்கிளில் வந்த நபர் முனியம்மாள் மீது மோதினார். இதில் படுகாயம் அடைந்த முனியம்மாளை அருகில் இருந்தவர்கள் மீட்டு சிகிச்சைக்காக ஓசூர் அரசு ஆஸ்பத்திரியில் சேர்த்தனர். அங்கு சிகிச்சை பலனின்றி முனியம்மாள் நேற்று முன்தினம் இறந்தார். இந்த விபத்து குறித்து ஓசூர் டவுன் போலீசார் விசாரணை நடத்தி வருகின்றனர்.

வடமாநில தொழிலாளி

அசாம் மாநிலம் சிபசாகர் மாவட்டத்தை சேர்ந்தவர் கைலாஷ் லிம்பு (30). இவர் சூளகிரி பகுதியில் தங்கி கூலி வேலை செய்து வந்தார். கடந்த 24-ந் தேதி இரவு இவர் ஓசூர்- கிருஷ்ணகிரி தேசிய நெடுஞ்சாலை சப்படி அருகில் நடந்து சென்று கொண்டிருந்தார்.

அப்போது அவ்வழியாக சென்ற வாகனம் அவர் மீது மோதியது. இதில் பலத்த காயமடைந்த கைலாஷ் லிம்புவை அருகில் இருந்தவர்கள் மீட்டு சிகிச்சைக்காக கிருஷ்ணகிரி அரசு மருத்துவக்கல்லூரி மருத்துவமனையில் சேர்த்தனர். பின்னர் மேல் சிகிச்சைக்காக சேலம் அரசு ஆஸ்பத்திரியில் அனுமதிக்கப்பட்ட அவர் சிகிச்சை பலனின்றி நேற்று முன்தினம் இறந்தார். இந்த விபத்து குறித்து சூளகிரி போலீசார் விசாரணை நடத்தி வருகின்றனர்.