வாகனம் மோதி தொழிலாளி பலி

திண்டுக்கல் மாவட்டம், அய்யலூர் குப்பம்பட்டி பகுதியை சேர்ந்தவர் வெள்ளியங்கிரி (வயது53). இவர் காங்கயம் அருகே மிதிபாறை பகுதியில் உள்ள ஒரு தேங்காய் களத்தில் தங்கி கூலி வேலை செய்து வந்தார். இந்த நிலையில் நேற்றுமுன்தினம் இரவு சுமார் 9.15 மணியளவில் முத்தூர் - காங்கயம் சாலையில் படியாண்டிபாளையம் பகுதியில் சாலையோரம் நடந்து சென்றார். அப்போது அந்த வழியாக வந்த ஒரு வாகனம் இவர் மீது மோதி விட்டு நிற்காமல் சென்றது.

இதில் வெள்ளியங்கிரி சம்பவ இடத்திலேயே பரிதாபமாக உயிரிழந்தார். இதுகுறித்து காங்கயம் போலீசாருக்கு தகவல் தெரிவிக்கப்பட்டது. அதன் பேரில் காங்கயம் போலீசார் சம்பவ இடத்திற்கு வந்து பலியானவர் உடலை மீட்டு பிரேத பரிசோதனைக்காக ஆம்புலன்ஸ் மூலம் காங்கயம் அரசு மருத்துவமனைக்கு அனுப்பிவைத்தனர். இந்த விபத்து குறித்து காங்கயம் போலீசார் வழக்குப்பதிவு செய்து விசாரணை நடத்தி வருகின்றனர்.