கல்லூரி நேரங்களில் கூடுதல் பஸ்கள் இயக்க வேண்டும்

கல்லூரி நேரங்களில் கூடுதல் பஸ்கள் இயக்க வேண்டும் என்று குறைதீர்வு கூட்டத்தில் கலெக்டரிடம் மாணவர்கள் கோரிக்க மனு அளித்தனர்.

குறைதீர்வு கூட்டம்

திருப்பத்தூர் மாவட்ட கலெக்டர் அலுவலக கூட்டரங்கில் மக்கள் குறை தீர்வு நாள் கூட்டம் கலெக்டர் அமர்குஷ்வாஹா தலைமையில் நடந்தது. அப்போது வீட்டுமனைப்பட்டா, முதியோர் உதவித்தொகை, கூட்டுறவு கடனுதவி, குடிநீர் வசதி மற்றும் பொதுநலன் குறித்து 375 மனுக்களை பொதுமக்களிடமிருந்து பெற்றுக்கொண்ட கலெக்டர் சம்பந்தப்பட்ட துறை அலுவலர்களிடம் வழங்கி மனுக்கள் மீது உரிய விசாரணை நடத்திய தகுதியானதாக இருப்பின் உடனடியாக நடவடிக்கை எடுக்க உத்தரவிட்டார்.

அப்போது கலெக்டர் பேசுகையில் பொதுமக்களிடம் இருந்து பெறப்பப்பட்ட கோரிக்கை மனுக்களில் காவல்துறை சம்மந்தப்பட்ட மனுக்கள் அதிக அளவு நிலுவையில் உள்ளது. இதனை குறைக்க உரிய நடவடிக்கை எடுக்க வேண்டும். மக்கள் குறைதீர்வு கூட்டத்திற்கு உயர் அலுவலர்கள் கட்டாயம் வரவேண்டும் என கூறினார். அதைத்தொடர்ந்து மாற்றுதிறனாளிகள் நலத்துறையின் சாபில் 5 மாற்றுதிறனாளிகளுக்கு 13 வகையான மருத்துவ உபகரணங்களை கலெக்டர் வழங்கினார்.

கூடுதல் பஸ்கள்

கூட்டத்தில் கந்திலி அருகே உள்ள கரியம்பட்டியில் இயங்கும் அரசு கலை மற்றும் அறிவியல் கல்லூரி மாணவர்கள் 50-க்கும் மேற்பட்டோர் கலெக்டரிம் மனு கொடுத்தனர். அதில் கல்லூரி பஸ் நிறுத்தத்தில் பஸ்கள் சரிவர நிற்பது கிடையாது. காலை நேரத்தில் 2 டவுன் பஸ்கள் மட்டுமே உள்ளது. திருப்பத்தூரில் இருந்து ஏராளமானோர் கல்லூரிக்கு சென்று வருகின்றனர். இதனால் கல்லூரி மாணவர்கள் பஸ்சின் படிக்கட்டில் தொங்கியவாறு பயணம் செய்ய வேண்டி உள்ளது.

இதனால் கல்லூரி மாணவர்களுக்கும், கண்டக்ருக்கும் இடையே அடிக்கடி பிரச்சினை ஏற்படுகிறது. எனவே காலை மற்றும் மாலை நேரங்களில் கூடுதல் பஸ்களை இயக்க வேண்டும் என அதில் கூறப்பட்டு இருந்தது. அதேபோல் திருப்பத்தூர் பகுதியை சேர்ந்த திருநங்கைகள், தங்களுக்கு வீட்டுமணை பட்டா வழங்குவதாக கூறினார்கள். ஆனால் இதுவரை எந்த நடவடிக்கையும் எடுக்கவில்லை என கூறி கலெக்டரிடம் முறையிட்டனர். அவர் விரைவில் வீட்டுமனை வழங்க நடவடிக்கை எடுக்கப்படும் என தெரிவித்தார்.

கூட்டத்தில் மாவட்ட வருவாய் அலுவலர் இ.வளர்மதி, கலெக்டரின் நேர்முக உதவியாளர்கள் வில்சன்ராஜசேகர், ஹரிஹரன், தனித்துணை கலெக்டர் கிருஷ்ணமூர்த்தி,கலால் உதவி ஆணையர் பானு, மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலர் சரஸ்வதி, மாவட்ட ஆதி திராவிடர் நல அலுவலர் ஜெயகுமார் உள்ளிட்ட பலர் கலந்து கொண்டனர்.