பாகலூர் அருகே போலீசார் வாகன சோதனை:ரூ.70 லட்சம் மதுபாட்டில்களுடன் வந்த லாரி சிக்கியதுஆவணங்களை ஒப்படைத்ததால் விடுவிப்பு

ஓசூர்

கிருஷ்ணகிரி மாவட்டம் பாகலூர் அருகே கக்கனூர் சோதனைச்சாவடியில், பாகலூர் போலீசார் வாகன சோதனையில் ஈடுபட்டனர். அப்போது பெங்களூருவில் இருந்து ஓசூர் நோக்கி வந்த லாரியை போலீசார் சோதனை செய்தனர். அதில் ரூ.70 லட்சம் மதிப்பிலான மதுபாட்டில்கள் இருப்பது தெரிய வந்தது. இதையடுத்து போலீசார் லாரியை பாகலூர் போலீஸ் நிலையத்திற்கு கொண்டு சென்றனர். இதுகுறித்து லாரி டிரைவரிடம் விசாரணை நடத்தியபோது மதுபாட்டில்கள் சென்னை அம்பத்தூருக்கு தனியார் நிறுவனம் சார்பில் கொண்டு சென்றது தெரியவந்தது.

இதுகுறித்து தகவல் அறிந்ததும், ஓசூர் ஆயத்தீர்வை துறை அதிகாரி சிதம்பரம், பாகலூர் போலீஸ் நிலையத்திற்கு நேரில் வந்து மதுபாட்டில்களுக்கு உரிய வரியை, தனியார் நிறுவனத்தினர் செலுத்திவிட்டனர் என்று கூறி, அதற்கான ஆவணங்களை போலீசாரிடம் ஒப்படைத்தார். இதையடுத்து போலீசார் லாரியை விடுவித்தனர்.