கிணற்றில் மூழ்கி முதியவர் சாவு

சிவகிரி அருகே உள்ள அண்ணாமலை கோட்டை என்ற ஊரை சேர்ந்தவர் பொன்னுச்சாமி (வயது 70). கூலித் தொழிலாளி. அவருடைய மனைவி கண்ணம்மாள் (65). பொன்னுச்சாமி வயோதிகம் காரணமாக உடல்நிலை சரியில்லாமல் இருந்து வந்தார். இவர் கடந்த 16-ந் தேதி முதல் காணவில்லை. இதனால் உறவினர்கள் அவரை தேடி வந்தனர்.

இந்த நிலையில் நேற்று மதியம் 1 மணி அளவில் அண்ணாமலை கோட்டையில் உள்ள 50 அடி ஆழ பொதுகிணறு அருகே பொன்னுச்சாமி பயன்படுத்திய கைத்தடி மற்றும் லுங்கி கிடந்தது. உடனே இதுபற்றி கொடுமுடி தீயணைப்பு நிலையத்துக்கு தகவல் கொடுத்தனர். அதைத்தொடர்ந்து தீயணைப்பு வீரர்கள் அங்கு சென்று கிணற்றில் இறங்கி அவரை தேடி பார்த்தனர். அப்போது பொன்னுச்சாமி பிணமாக மீட்கப்பட்டார்.

இதுபற்றி அறிந்ததும் சிவகிரி போலீசார் அங்கு சென்று பிணத்தை பிரேத பரிசோதனைக்காக கொடுமுடி அரசு ஆஸ்பத்திரிக்கு அனுப்பி வைத்தனர்.

இதுகுறித்து போலீசார் நடத்திய விசாரணையில், கிணற்றில் இறங்கி குளித்து கொண்டிருந்த பொன்னுச்சாமி 30 அடி தண்ணீரில் மூழ்கி இறந்தது தெரியவந்தது. மேலும் போலீசார் வழக்குப்பதிவு செய்து விசாரணை நடத்தி வருகிறார்கள்.