ஆத்மநாதசுவாமி கோவிலில் ஆனி திருமஞ்சன தேரோட்டம்

ஆத்மநாதசுவாமி கோவில்

புதுக்கோட்டை ஆவுடையார்கோவிலில் திருவாவடுதுறை ஆதீனத்திற்கு சொந்தமான ஆத்மநாதசுவாமி கோவில் உள்ளது. இக்கோவிலில் ஆனி திருமஞ்சன திருவிழா கடந்த 15-ந் தேதி கொடியேற்றத்துடன் தொடங்கியது. தொடர்ந்து சிறப்பு பூஜைகள் நடைபெற்று வந்தது.

மாணிக்கவாசகர் தினமும் காலை, மாலை வேளையில் வீதியுலா வந்து பக்தர்களுக்கு அருள்பாலித்தார். 7-ம் நாள் திருவிழாவில் குருத்தோலை சப்பரத்தில் வெள்ளி இடப வாகனத்தில் மாணிக்கவாசகர் வலம் வந்தார்.

தேரோட்டம்

திருவிழாவின் சிகர நிகழ்ச்சியான தேரோட்டம் நேற்று நடைபெற்றது. திருத்தேரில் சிறப்பு அலங்காரத்தில் மாணிக்கவாசகர் எழுந்தருளினார். பின்னர் தேரை திரளான பக்தர்கள் வடம் பிடித்து இழுத்தனர். அப்போது பக்தர்கள் ஆத்மநாதா... மாணிக்க வாசகா... என்று பக்தி கோஷங்களை எழுப்பினர். காலை 9.50 மணிக்கு ஆத்மநாதசுவாமி கோவிலில் இருந்து புறப்பட்ட தேர் 4 வீதிகள் வழியாக அசைந்தாடி வந்தது. அப்போது பக்தர்கள் சுவாமிக்கு தேங்காய், பழம் வைத்து அர்ச்சனை செய்து வழிபட்டனர். பின்னர் தேர் மதியம் 12.30 மணியளவில் கோவில் நிலையை வந்தடைந்தது. இதில் திரளான பக்தர்கள் கலந்து கொண்டு மாணிக்கவாசகரை தரிசனம் செய்தனர் தேரோட்டத்தை யொட்டி 7 இடங்களில் பக்தர்களுக்கு அன்னதானம் வழங்கப்பட்டது.

உபதேச காட்சி

இதையடுத்து இரவு வெள்ளி சந்திர பிரபை வாகனத்தில் நடராஜர் அலங்காரத்தில் மாணிக்கவாசகர் வீதியுலா வந்தார். விழாவின் 10-ம் நாள் திருவிழாவான இன்று (சனிக்கிழமை) காலை வெள்ளி படிச்சட்ட வாகனத்தில் பிச்சாடனார் அலங்காரக்காட்சி, பஞ்சப்பிரகார சேவை காட்சியும், இரவு புதிதாக செய்யப்பட்ட வெள்ளி தேரில் ராஜ அலங்காரத்தில் மாணிக்கவாசகர் வீதியுலா வந்து பக்தர்களுக்கு அருள்பாலிக்கிறார்.

நாளை (ஞாயிற்றுக்கிழமை) அதிகாலை 5 மணிக்கு மேல் 6 மணிக்குள் சிவபெருமான் மாணிக்கவாசகருக்கு உபதேசித்து அருளிய உபதேச காட்சி நடைபெறுகிறது. விழாவுக்கான ஏற்பாடுகளை ஆத்மநாதசுவாமி கோவில் நிர்வாகிகள் செய்து வருகின்றனர். பாதுகாப்பு ஏற்பாடுகளை அறந்தாங்கி போலீஸ் துணை சூப்பிரண்டு தினேஷ்குமார் தலைமையில் ஆவுடையார்கோவில் போலீசார் செய்திருந்தனர்.