ஊட்டி

தமிழகத்தில் போதைப்பொருள் பயன்பாடு அதிகளவில் இருப்பதாகவும், அதை ஒழிக்க தீவிர நடவடிக்கை எடுக்க வேண்டும் என்றும் போலீசாருக்கு, டி.ஜி‌பி. சைலேந்திரபாபு உத்தரவிட்டார். அதன்படி ஒருபுறம் போதைப்பொருள் விற்பனையில் ஈடுபடுபவர்கள் கைது செய்யப்படுகிறார்கள். மற்றொருபுறம் பள்ளி, கல்லூரி மாணவ-மாணவிகளுக்கு போதைப்பொருள் பயன்பாட்டை ஒழிக்க விழிப்புணர்வு ஏற்படுத்தப்பட்டு வருகிறது.

இந்த நிலையில் ஊட்டி தேனாடுகம்பை போலீசார், அணிக்கொரையில் உள்ள தனியார் மேல்நிலைப்பள்ளியில் மாணவ-மாணவிகளுக்கு விழிப்புணர்வு ஏற்படுத்தினர். அப்போது தமிழகத்தில் போதைப்பொருள் பயன்பாட்டை ஒழிக்க உறுதுணையாக இருப்போம் என்று அனைவரும் உறுதிமொழி எடுத்துக்கொண்டனர்.

இதற்கு ஊட்டி ஊரக போலீஸ் துணை சூப்பிரண்டு விஜயலட்சுமி தலைமை தாங்கினார். சப்-இன்ஸ்பெக்டர் செந்தில்குமார் மற்றும் பலர் கலந்து கொண்டனர். தொடர்ந்து போதைப்பழக்கத்திற்கு எதிராக விழிப்புணர்வு பேரணி நடத்தப்பட்டது. அதில் பல்வேறு விழிப்புணர்வு வாசகங்கள் அடங்கிய பதாகைகளை மாணவ-மாணவிகள் கையில் ஏந்தியவாறு சென்றனர்.