பெண்ணை பாலியல் தொந்தரவு செய்த வட மாநில வாலிபர்கள் 3 பேர் கைது

பெண்ணை பாலியல் தொந்தரவு செய்த வட மாநில வாலிபர்கள் 3 பேர் கைது செய்யப்பட்டனர்.

பாலியல் தொந்தரவு

பல்லடம் அருகே உள்ள எம்.ஊத்துக்குளி பகுதியில் தனியார் தொழிற்சாலை உள்ளது. இங்கு அசாம் மாநிலத்தைச் சேர்ந்த கணவன்-மனைவி இருவரும் வேலை செய்து வருகின்றனர். இந்த நிலையில், நேற்று முன்தினம் இரவு கணவர் மட்டும் வேலைக்கு சென்றுவிட்டார். அவரது மனைவி தனியே வீட்டில் தூங்கிக் கொண்டிருந்தார்.

அப்போது அதே நிறுவனத்தில் வேலைபார்க்கும் வடமாநில வாலிபர்கள் 3 பேர், வீட்டிற்குள் அத்துமீறி புகுந்து, தனியாக இருந்த அந்தப் பெண்ணுக்கு பாலியல் தொந்தரவு கொடுத்ததாக கூறப்படுகிறது. இதனால் அதிர்ச்சி அடைந்த அவர் அலறித் துடித்தார். இதையடுத்து அவர்கள் 3 பேரும் அங்கிருந்து தப்பி ஓடி விட்டனர்.

3 பேர் கைது

பெண்ணின் அலறல் சத்தம் கேட்டு தொழிற்சாலையில் இருந்து வந்த தொழிலாளர்கள் அந்தப் பெண்ணை மீட்டு சிகிச்சைக்காக பல்லடம் அரசு மருத்துவமனையில் சேர்த்தனர். அங்கு சிகிச்சை பெற்ற நிலையில் அவர் கொடுத்த புகாரின் பேரில், தப்பியோடிய வடமாநில வாலிபர்களான அமருஇஸ்லாம், அனிப்அலி, இப்ராகிம் அலி ஆகிய 3 பேரை அனைத்து மகளிர் போலீஸ் நிலைய போலீசார் கைது செய்து விசாரணை மேற்கொண்டு வருகின்றனர். இந்த சம்பவம் பல்லடத்தில் பரபரப்பை ஏற்படுத்தியுள்ளது.