வாலிபரிடம் பணம் பறித்த 4 பேர் கைது

திண்டுக்கல் மாவட்டம் சிலவத்தூர் குமரன் திருநகரை சேர்ந்தவர் செல்வகுமார் (வயது 34). சம்பவத்தன்று இவர் மதுரை ஆரப்பாளையம் பஸ் நிலையம் அருகே நின்று கொண்டிருந்தார். அப்போது 4 பேர் கொண்ட கும்பல் அவரை வழிமறித்தது. பின்னர் அந்த கும்பல் கத்தியை காட்டி செல்வகுமாரை மிரட்டி அவரிடமிருந்து 1,500 ரூபாயை பறித்து கொண்டு தப்பியது. இது குறித்த புகாரின் பேரில் கரிமேடு போலீசார் வழக்குப்பதிவு செய்து விசாரணை நடத்தினர். அதில் வழிப்பறியில் ஈடுபட்டது மேல பொன்னகரம் 2-வது தெருவை சேர்ந்த கார்த்திக் (20), பாண்டி (23), கோபிநாதன் (21), மணிகண்டன் (23) ஆகியோர் என்பது தெரியவந்தது. இதையடுத்து அவர்களை போலீசார் கைது செய்தனர்.