இடப்பிரச்சினையில் தம்பதி மீது தாக்குதல்; வாலிபர் கைது

தா.பழூர்:

அரியலூர் மாவட்டம், தா.பழூர் அருகே உள்ள வேணாநல்லூர் தெற்கு தெருவை சேர்ந்தவர் சாமிக்கண்ணு. இவரது மனைவி கனகவல்லி(வயது 55). சாமிக்கண்ணுக்கும், பக்கத்து வீட்டில் வசித்து வரும் வினோத் (34) என்பவருக்கும் இடப்பிரச்சினை இருந்து வந்தது. சம்பவத்தன்று வினோத் மற்றும் அவரது மனைவி மகேஸ்வரி ஆகியோர் கனகவல்லி வீட்டிற்கு முன்பு நின்று இடப்பிரச்சினை தொடர்பாக தகாத வார்த்தைகளால் திட்டி சாமிக்கண்ணுவை தாக்கியதாக தெரிகிறது. இந்த தகராறை தடுக்க வந்த கனகவல்லியை தாக்கி, கீழே தள்ளி செருப்பால் அடித்ததாக கூறப்படுகிறது. இதில் காயமடைந்த கனகவல்லி மற்றும் சாமிக்கண்ணு ஆகியோர் 108 ஆம்புலன்ஸ் மூலம் ஜெயங்கொண்டம் அரசு மருத்துவமனையில் சிகிச்சைக்காக சேர்க்கப்பட்டனர். இந்த சம்பவம் குறித்து கனகவல்லி தா.பழூர் போலீசில் கொடுத்த புகாரின்பேரில் சப்-இன்ஸ்பெக்டர் பன்னீர்செல்வம் விசாரணை நடத்தி, பெண் வன்கொடுமை தடுப்புச் சட்டத்தில் வினோத் மற்றும் அவரது மனைவி மகேஸ்வரி ஆகியோர் மீது வழக்குப்பதிவு செய்து வினோத்தை கைது செய்தார்.