சிறப்பாக பணியாற்றிய போலீசாருக்கு பரிசு

நெல்லை மாவட்டத்தில் உள்ள அனைத்து துணை போலீஸ் சூப்பிரண்டுகள் மற்றும் இன்ஸ்பெக்டர்கள் மாதாந்திர ஆய்வு கூட்டம் போலீஸ் சூப்பிரண்டு அலுவலகத்தில் நேற்று நடந்தது. சூப்பிரண்டு சிலம்பரசன் தலைமை தாங்கி பேசினார்.

கூட்டத்தில், மாவட்டத்தில் உள்ள அனைத்து வழக்குகளின் புலன் விசாரணை குறித்தும், நிலுவையில் உள்ள வழக்குகள் குறித்தும், கஞ்சா மற்றும் புகையிலை போன்ற போதைப்பொருட்கள் கடத்தல் மற்றும் விற்பனையில் ஈடுபடுபவர்கள் மீது கடும் நடவடிக்கை மேற்கொள்வது குறித்தும், பொது அமைதிக்கு பங்கம் விளைவிப்பவர்கள் மீதும் ரவுடிகள் மீது மேற்கொள்ளப்பட்டு வரும் நடவடிக்கைகள் குறித்தும், நீதிமன்ற அலுவல்கள் குறித்தும் ஆய்வு நடைபெற்றது.

முன்னதாக மாவட்ட ஆயுதப்படை மைதானத்தில் காவல்துறை வாகனங்கள் நல்லமுறையில் பராமரிக்கப்படுகிறதா? என ஆய்வு மேற்கொண்டு வாகன ஓட்டுநர்ளுக்கு முக்கிய அறிவுரைகள் வழங்கினார்.

பின்னர் மாவட்டத்தில் கொலை, போக்சோ வழக்குகளில் உள்ள சாட்சிகளை விரைவாக நீதிமன்றத்தில் ஆஜர்படுத்தி குற்றவாளிகளுக்கு தண்டனை பெற்று கொடுத்த போலீஸ் அதிகாரிகள் மற்றும் போலீசார் உள்பட மாவட்டத்தில் சிறப்பாக பணிபுரிந்த 33 பேரை சூப்பிரண்டு சிலம்பரசன் நேரில் அழைத்து நற்சான்றிதழ் மற்றும் வெகுமதி வழங்கி பாராட்டினார்.