புதுக்கிணறு கிராமத்தில் மாற்றத்தை தேடி விழிப்புணர்வு நிகழ்ச்சி

தட்டார்மடம்:

தூத்துக்குடி மாவட்ட போலீஸ் சூப்பிரண்டு பாலாஜி சரவணன் உத்தரவின்பேரில் சாத்தான்குளம் அருகே புதுக்கிணறு கிராமத்தில் மாற்றத்தை தேடி விழிப்புணர்வு நிகழ்ச்சி நடந்தது. இதில் சாத்தான்குளம் அனைத்து மகளிர் நிலைய போலீஸ் இன்ஸ்பெக்டர் பாமா பத்மினி தலைமையில் போலீசார் கலந்து கொண்டு, பொதுமக்கள், இளைஞர்களிடம் கஞ்சா, புகையிலை போன்ற போதை பொருட்கள் பயன்படுத்துவதால் ஏற்படும் விளைவுகள் குறித்தும், பெண்கள் மற்றும் குழந்தைகளுக்கு எதிரான பாலியல் குற்றங்கள், போக்சோ சட்டங்கள் குறித்தும், குழந்தை திருமண தடைச் சட்டம், குழந்தை தொழிலாளர் தடுப்புச் சட்டம், சாலை விதிகள் குறித்தும் விழிப்புணர்வு ஏற்படுத்தினர்.

மேலும், போலீசார் முன்னிலையில், சாதி, மத வேற்றுமைகள் இல்லாத தூத்துக்குடி மாவட்டத்தை உருவாக்குவோம், எந்த சூழ்நிலையிலும் எக்காரணம் கொண்டும் கத்தி, அரிவாள் மற்றும் எந்த கொடிய ஆயுதங்களையும் பயன்படுத்த மாட்டோம், என்று பொதுமக்கள் உறுதிமொழி எடுத்து கொண்டனர்.