லாரி மோதி சிறுவன் சாவு

வடுவூர் அருகே லாரி மோதி சிறுவன் பரிதாபமாக இறந்தான். இதுதொடர்பாக டிரைவரை போலீசார் கைது செய்தனர்.

லாரி மோதி சிறுவன் சாவு

திருவாரூர் மாவட்டம் வடுவூர் அருகே உள்ள காரக்கோட்டையை சேர்ந்தவர் பாஸ்கரன். இவரது மகன் அகல்யன் (வயது17). இவன் 10-ம் வகுப்பு வரை படித்துவிட்டு வீட்டில் இருந்தான். நேற்று இவன் ஸ்கூட்டரில் மன்னார்குடி- தஞ்சாவூர் மெயின் ரோட்டில் எடகீழையூர் பிரிவு சாலை அருகே சாலையை கடக்க முயன்றான். அப்போது தஞ்சையில் இருந்து காய்கறி ஏற்றிக்கொண்டு மன்னார்குடி நோக்கி சென்ற சரக்கு லாரி எதிர்பாராதவிதமாக அகல்யன் சென்ற ஸ்கூட்டர் மீது மோதியது.

இதில் பலத்த காயம் அடைந்த அகல்யனை அக்கம்பக்கத்தினர் மீட்டு மன்னார்குடி அரசு ஆஸ்பத்திரிக்கு அனுப்பி வைத்தனர். ஆனால் சிறுவன் செல்லும் வழியிலேயே பரிதாபமாக இறந்தான்.

டிரைவர் கைது

இதுகுறித்து வடுவூர் போலீசார் வழக்குப்பதிவு செய்து லாரி டிரைவர் சதீஷ் (37) என்பவரை கைது செய்து விசாரணை நடத்தி வருகின்றனர்.

உயிரிழந்த அகல்யனின் உடல் மன்னார்குடி அரசு ஆஸ்பத்திரியில் பிரேத பரிசோதனை செய்யப்பட்டு அவரது குடும்பத்தினரிடம் ஒப்படைக்கப்பட்டது. லாரி மோதி சிறுவன் பலியான சம்பவம் அப்பகுதியில் பெரும் சோகத்தை ஏற்படுத்தியது.