முளைப்பாரி திருவிழாவையொட்டி மாட்டு வண்டி பந்தயம்

காளையார்கோவில்,

காளையார்கோவில் முத்துமாரியம்மன் கோவில் முளைப்பாரி திருவிழாவையொட்டி மாட்டு வண்டி பந்தயம் நடைபெற்றது.

முளைப்பாரி திருவிழா

காளையார்கோவிலில் உள்ள முத்துமாரியம்மன் கோவில் முளைப்பாரி திருவிழாவையொட்டி மாட்டு வண்டி பந்தயம் காளையார்கோவில்-தொண்டி சாலையில் நடைபெற்றது. இதில் மொத்தம் 32 வண்டிகள் கலந்துகொண்டன. பெரியமாட்டு வண்டி பந்தயம், சின்னமாட்டு வண்டி பந்தயம் என இருபிரிவாக போட்டி நடைபெற்றது.

அதன்படி முதலில் நடைபெற்ற பெரியமாட்டு வண்டி பந்தயத்தில் 8 வண்டிகள் கலந்துகொண்டன. இந்த போட்டியில் முதல் பரிசை அவனியாபுரம் மோகன்சாமிகுமார் வண்டியும், 2-வது பரிசை நாட்டரசன்கோட்டை கண்மணிபாண்டியன் வண்டியும், 3-வது பரிசை துரும்புபட்டி மாதவன் வண்டியும், 4-வது பரிசை நெற்புகப்பட்டி ரிதன்யாசதீஸ்குமார் வண்டியும் பெற்றது.

பரிசுகள்

இதை தொடர்ந்து நடைபெற்ற சின்னமாட்டு வண்டி பந்தயத்தில் 24 வண்டிகள் கலந்துகொண்டன. அதில் முதல் பரிசை நகரம்பட்டி வைத்தியா வண்டியும், 2-வது பரிசை தேனி மாவட்டம் கோம்பை பொன்னுச்சாமி வண்டியும், 3-வது பரிசை சொக்கநாதபுரம் பாலு வண்டியும், 4-வது பரிசை சாத்தம்பத்தி சரவணன் வண்டியும், 5-வது பரிசை வெளிமுத்தி வாகினி பைனான்ஸ் வண்டியும், 6-வது பரிசை குளக்கட்டபட்டி மீராராவுத்தர் வண்டியும் பெற்றது.

இந்த போட்டிகளில் வெற்றி பெற்ற வண்டிகளின் உரிமையாளர்களுக்கு பரிசுகள் வழங்கப்பட்டன. மேலும் மாட்டு வண்டி பந்தயத்தை காண சுற்று வட்டார பகுதிகளில் இருந்து ஏராளமான பொதுமக்கள் சாலையின் இருபுறமும் திரண்டு இருந்தனர்.