மோட்டார் சைக்கிள் மீது பஸ் மோதல்; பிளஸ்-2 மாணவர் பலி

பிளஸ்-2 மாணவர்

அரவக்குறிச்சி அருகே சேந்தமங்கலம் மேல்பாகம் ஊராட்சி ஆர்.எல்லப்பட்டியை சேர்ந்தவர் கருப்புசாமி. இவருடைய மகன் மோகன்ராஜ் (வயது 17). இவர் அரவக்குறிச்சியில் உள்ள தனியார் பள்ளியில் பிளஸ்-2 படித்து வந்தார்.

நேற்று காலை வழக்கம்போல் பள்ளி செல்வதற்காக தனது வீட்டிலிருந்து பஸ்சுக்காக மோகன்ராஜ் காத்திருந்தார். ஆனால் பஸ் புறப்பட்டு சென்று விட்டதால் காலை 7.30 மணிக்கு தனது வீட்டில் வைத்திருந்த மோட்டார் சைக்கிளை எடுத்துக் கொண்டு பள்ளிக்கு புறப்பட்டு சென்றார்.

பஸ் மோதி பலி

அப்போது தலையாரிப்பட்டி பிரிவு அருகே சென்றபோது எதிர் திசையில் வந்த தனியார் பஸ் மோட்டார் சைக்கிள் மீது பயங்கரமாக மோதியது. இந்த விபத்தில் படுகாயம் அடைந்த மோகன்ராஜ் சம்பவ இடத்திலேயே ரத்த வெள்ளத்தில் பரிதாபமாக இறந்தார். இதுகுறித்து தகவல் அறிந்த அரவக்குறிச்சி போலீசார் சம்பவ இடத்திற்கு விரைந்து சென்று மோகன்ராஜின் உடலை கைப்பற்றி பிரேத பரிசோதனைக்காக அரவக்குறிச்சி அரசு மருத்துவமனைக்கு அனுப்பி வைத்தனர்.மேலும் இந்த விபத்து தொடர்பாக போலீசார் வழக்குப்பதிவு செய்து விசாரணை நடத்தி வருகிறார்கள்.