பஸ்கள் சாலையில் நிறுத்தப்படுவதால் போக்குவரத்து பாதிப்பு

வல்லம்:

வல்லம் பஸ் நிலையத்திற்குள் வாகனங்கள் நிறுத்துவதால் மாணவ-மாணவிகள் அவதிப்பட்டு வருகின்றனர். இதனால் பயணிகளை இறக்கிவிட பஸ்கள் சாலையில் நிறுத்தப்படுவதால் போக்குவரத்து பாதிப்பு ஏற்படுகிறது. இதுதொடர்பான அதிகாரிகள் நடவடிக்கை எடுக்க பொதுமக்கள் கோரிக்கை விடுத்துள்ளனர்.

கல்வி நிறுவனங்கள்

தஞ்சை அருகே உள்ள வல்லத்தில் பள்ளிகள், கல்லூரிகள், நிகர்நிலை பல்கலைக்கழகங்கள், தொழிற்பயிற்சி நிலையங்கள், நர்சிங் பயிற்சி அளிக்கும் கல்வி நிறுவனங்கள் அமைந்துள்ளன. இந்த கல்வி நிறுவனங்களில் வல்லம் மற்றும் அதனை சுற்றியுள்ள கிராமப்பகுதிகளில் இருந்து தினமும் ஆயிரக்கணக்கான மாணவர்கள் வந்து படித்து செல்கின்றனர்.

மேலும் திருச்சி உள்பட முக்கிய நகரங்களுக்கு செல்லும் பஸ்களும் இவ்வழியாக செல்ல வேண்டும். இதனால் வல்லம் பகுதி எப்போதும் போக்குவரத்து நிறைந்து காணப்படும். வல்லத்தை சேர்ந்த மாணவர்கள் தஞ்சையில் உள்ள பள்ளி, கல்லூரிகளுக்கு படிக்க செல்கின்றனர்.

பஸ் நிலையத்திற்குள் நிறுத்தப்படும் வாகனங்கள்

வல்லத்தை சுற்றியுள்ள கிராமங்களை சேர்ந்த பொதுமக்கள் வல்லம் வந்து தஞ்சை, திருச்சி உள்ளிட்ட பல பகுதிகளுக்கு செல்ல வேண்டும்.

இதனால் வல்லத்தில் எப்போதும் போக்குவரத்து நிறைந்து காணப்படும். தஞ்சையில் இருந்து மருத்துவக்கல்லூரி வழியாக வல்லத்திற்கு பஸ்கள் மற்றும் ஷேர் ஆட்டோக்கள் அதிகம் இயக்கப்படுகின்றன.

இந்த நிலையில் வல்லத்திற்கு வரும் டவுன் பஸ்கள் பஸ் நிலையத்தில் நிறுத்த முடியாத நிலை உள்ளது. பஸ் நிலையத்தின் இருபுறமும் காலை, மாலை வேளைகளில் மோட்டார் சைக்கிள் உளளிட்ட வாகனங்கள் வரிசையாக நிறுத்தப்படுகின்றன. இதனால் காலையில் தஞ்சை மற்றும் திருச்சி உள்பட பல்வேறு பகுதிகளுக்கு பள்ளி மற்றும் கல்லூரிகளுக்கு மாணவ, மாணவிகள் பஸ் நிலையத்திற்கு உள்ளே நிற்க முடியாத நிலை இருந்து வருகிறது. பஸ்சுக்காக சாலையில் வெயிலில் காத்திருக்கின்றனர்.

போக்குவரத்து நெரிசல்

வல்லம் பஸ் நிலையத்தில் உள்ள கடைகளும் தங்களுக்கு உள்ள அளவை தாண்டி பொதுமக்கள் நடந்து செல்லும் நடைபாதை வரை கடைகளை விரிவுப்படுத்தி உளள்னர். பஸ் நிலையம் முழுவதும் வாகனங்கள் நிறுத்தப்பட்டுள்ளது.

இதன் காரணமாக தஞ்சையில் இருந்து வல்லம் வழியாக ஆலக்குடி, வல்லம்புதூர் உள்பட பல கிராமப் பகுதிகளுக்கு செல்லும் டவுன் பஸ்கள் சாலையிலேயே நிறுத்தி பயணிகளை இறக்கி விடுவதால் போக்குவரத்து நெரிசலும் ஏற்படுகிறது.

நடவடிக்கை

பேரூராட்சி சார்பில் பஸ் நிலையம் உள்ளே வாகனங்கள் நிறுத்த கூடாது என்று வைக்கப்பட்டுள்ள பலகை பெயர் அளவிற்கு தான் உள்ளது. எனவே வல்லம் பஸ் நிலையத்தில் உள்ள ஆக்கிரமிப்புகள் அகற்ற வேண்டும். பஸ் நிலையத்திற்குள் வாகனங்கள் நிறுத்துவதை தடுக்க வேண்டும்அவ்வாறு நிறுத்தப்படும் வாகனங்களை போலீசார் மற்றும் பேரூராட்சி அதிகாரிகள் பறிமுதல் செய்ய வேண்டும் என பொதுமக்கள் கோரிக்கை விடுத்துள்ளனர்.