இருசக்கர வாகனம் மீது கார் மோதி விபத்து - 4 வயது சிறுவன் பலி

கோவில்பட்டி,

தூத்துக்குடி மாவட்டம், விளாத்திகுளத்தையடுத்த வெங்கடேஷ்வராபுரத்தைச் சேர்ந்தவர் மார்சல் ராஜா (வயது 38). காடல்குடி காவல் நிலையத்தில் முதல் நிலை காவலராக பணியாற்றி வருகிறார். இவரது மனைவி தேவிகா (30). இவர்களுக்கு ரஸ்வந்த்(6), ரிஷாந்த்(4) என இரு மகன்கள் உள்ளனர்.

இவர்கள் நேற்று திட்டங்குளத்தில் இருந்து இருசக்கரவாகனத்தில் வீடு திரும்பி கொண்டிருந்தனர். அப்போது தொழிற்பேட்டை அருகே சாலையை கடக்க முயன்ற போது எட்டயபுரத்தில் இருந்து கோவில்பட்டி நோக்கி சென்று கொண்டிருந்த கார் இருசக்கரவாகனத்தின் மீது பலமாக மோதி விபத்துக்கு உள்ளானது. இதில் 4 பேரும் தூக்கி வீசப்பட்டு பலத்த காயம் அடைந்தனர்.

அருகில் இருந்தவர்கள் அவர்களை மீட்டு கோவில்பட்டி அரசு மருத்துவமனைக்கு அனுப்பி வைத்தனர். இந்த விபத்தில் சிறுவன் ரிஷாந்த் சிகிச்சை பலனின்றி பரிதாபமாக உயிரிழந்தார். பலத்த காயம் அடைந்த மார்சல் ராஜா மேல் சிகிச்சைக்காக மதுரை அரசு மருத்துவமைக்கு அனுப்பி வைக்கப்பட்டுள்ளார்.

விபத்து குறித்து தகவல் அறிந்து வந்த கிழக்கு காவல் நிலைய போலீசார் இது தொடர்பாக வழக்குப்பதிவு செய்து காரை ஓட்டி வந்த சிவராமச்சந்திரனை(24) கைது செய்து விசாரணை மேற்கொண்டு வருகின்றனர்.