கார்-மொபட் மோதல்;மூதாட்டி பலி

காங்கயம்

திருப்பூர் மணியம்பாளையம் பகுதியை சேர்ந்தவர் தங்கராஜ் (வயது-65)இவர் தனது மனைவி ஆனந்தி (60) உடன் ஒரு மொபட்டில் ஊத்துக்குளி அருகே உள்ள வள்ளி நிலையம் பகுதியில் உள்ள தனது மகள் வீட்டிற்கு சென்றுவிட்டு நேற்று முன்தினம் ஊத்துக்குளி-படியூர் ரோட்டில் வந்து கொண்டு இருந்துள்ளார்.அப்போது எதிரே வந்த கார் ஒன்று வேகமாக வந்து மொபட் மீது மோதியுள்ளது. அதில் தங்கராஜ் மற்றும் ஆனந்தி தூக்கி வீசப்பட்டு உயிருக்கு போராடி கொண்டு இருந்தனர். இதனைப் பார்த்த வாகன ஓட்டிகள் அவர்களை மீட்டு ஆம்புலன்ஸ் மூலம் மருத்துவ மனைக்கு அனுப்பி வைத்தனர்.பலத்த காயம் அடைந்த ஆனந்தியை திருப்பூர் அரசு ஆஸ்பத்திரிக்கு கொண்டு சென்றனர்.அங்கு அவரை பரிசோதித்த மருத்துவர்கள் அவர் ஏற்கனவே இறந்து விட்டதாக கூறியுள்ளனர்.காயம் அடைந்த தங்கராஜ் கோவையில் உள்ள தனியார் மருத்துவ மனையில் சிகிச்சை பெற்று வருகிறார்.இதுகுறித்து காங்கேயம் போலீசார் விபத்தை ஏற்படுத்திய காரை ஓட்டி வந்த திண்டுக்கல் மாவட்டம் சோலை குளத்துபட்டியை சேர்ந்த சிவா என்பவர் மீது வழக்குப்பதிவு செய்து விசாரணை நடத்தி வருகின்றனர்.