திருப்புவனம்

திருப்புவனம் அருகே உள்ள அல்லிநகரம் கிராமத்தில் புகழ்பெற்ற தண்டீஸ்வர அய்யனார் கோவில் உள்ளது. இந்த கோவிலில் ஒவ்வொரு ஆண்டும் வருடாபிஷேக விழா 11 நாட்கள் தொடர்ந்து நடைபெறும். இந்த ஆண்டு 41-வது வருடாபிஷேகத்தை முன்னிட்டு கோவிலில் காப்பு கட்டுதலுடன் விழா நேற்று தொடங்கியது. விழாவின் முக்கிய நிகழ்ச்சியாக வருகின்ற 26-ந் தேதி (வெள்ளிக்கிழமை) தண்டீஸ்வர அய்யனார் சுவாமிக்கும் மற்றும் சகல பரிவார தெய்வங்களுக்கும் வருடாபிஷேக தீர்த்த பூஜை உற்சவ விழா நடைபெறுகிறது. அன்னதானமும் நடக்கிறது. விழாவை முன்னிட்டு தினமும் விசேஷ பூஜைகள் மற்றும் நாடகங்கள் நடைபெறுகின்றன. விழாவிற்கான ஏற்பாடுகளை விழாக்குழுவினர் செய்து வருகின்றனர்.