கோவை: வீட்டின் மீது உருண்டு விழுந்த ராட்ச பாறைகள் - அதிர்ஷ்டவசமாக உயிர்தப்பி குடும்பம்...!

கோவை,

கோவை மாவட்டம் மதுக்கரை அருகே உள்ள மலைச்சாமி கோவில் வீதியில் கடந்த 60 ஆண்டுகளுக்கு முன் அரசு பட்டா வழங்கிய நிலத்தில் சுமார் 100-க்கும் மேற்பட்டோர் வீடு கட்டி வசித்து வருகின்றனர்.

இதேபோன்று, லீலாவதி என்பவர் தனது மகள் வசந்தகுமார், பேத்தி சசிகலா மற்றும் பேரக்குழந்தைகளுடன் அங்கு உள்ள ஒரு வீட்டில் வசித்து வருகிறார். இந்த நிலையில் நேற்று லீலாவதி மற்றும் சசிகலா அவரது குழந்தைகளுடன் வீட்டில் இருந்த போது வீட்டின் சுவர் மீது ஏதோ மோதியது போல சத்தம் கேட்டுள்ளது.

இதையடுத்து வீட்டில் இருந்த அனைவரும் வெளியே வந்து பார்த்துள்ளனர். அப்போது அருகே இருந்த பாறை ஒன்று உருண்டு வீட்டின் சுவர் மீது மோதியது தெரியவந்தது. அப்போது திடிரென மற்றொரு ராட்ச பாறை உருண்டு வீட்டின் சுவர் மீது மோதியதில் சுவரின் ஒரு பக்கம் உடைந்து விழுந்தது. இதனால் அங்கு பரபரப்பு ஏற்பட்டது.

வீட்டிற்குள் யாரும் இல்லாததால் பெரும் அசம்பாவிதம் தவிர்க்கப்பட்டது. இதுகுறித்து தகவறிந்து வந்த மதுக்கரை போலீசார் மற்றும் மதுக்கரை வட்ட வருவாய் ஆய்வாளர் ஜெயகவுசல்யா ஆகியோர் நேரில் ஆய்வு மேற்கொண்டனர்.