விளையாட்டு விடுதியில் சேர மாணவ, மாணவிகள் விண்ணப்பிக்கலாம்-கலெக்டர் தகவல்

விளையாட்டில் சிறந்து விளங்கும் மற்றும் ஆர்வம் கொண்டுள்ள மாணவ, மாணவிகள், சிறப்பு விளையாட்டு விடுதியில் சேர ஆன்லைன் மூலம் விண்ணப்பிக்கலாம் என கலெக்டர் தெரிவித்துள்ளார்

சிவகங்கை மாவட்ட கலெக்டர் மதுசூதன்ரெட்டி வெளியிட்டுள்ள செய்திக்குறிப்பில் கூறியுள்ளதாவது:-

விளையாட்டு

கல்லுாரிகளில் பயிலும் மாணவ, மாணவிகளுக்கு விளையாட்டுத் துறையில் சாதனைகள் படைப்பதற்கு ஏற்ப, அறிவியல் பூர்வமான பயிற்சி, தங்குமிட வசதி மற்றும் சத்தான உணவுடன் கூடிய சிறப்பு விளையாட்டு விடுதிகள் தமிழ்நாடு விளையாட்டு மேம்பாட்டு ஆணையத்தின் கீழ் செயல்பட்டு வருகின்றன. அதன்படி, மாணவர்களுக்கான, சென்னை மாவட்டத்தில் நேரு விளையாட்டரங்கத்தில் உள்ள சிறப்பு விளையாட்டு விடுதியில் தடகளம், கூடைப்பந்து, குத்துச்சண்டை, பளு தூக்குதல் மற்றும் வாள் சண்டை ஆகிய விளையாட்டுக்களும், மாணவர்களுக்கு கோவில்பட்டி, தூத்துக்குடி ஆகிய மாவட்டங்களில் உள்ள சிறப்பு விளையாட்டு விடுதியில், ஹாக்கி விளையாட்டும், மாணவிகளுக்கு சென்னை மாவட்டத்தில் உள்ள நேரு விளையாட்டரங்க சிறப்பு விளையாட்டு விடுதி தடகளம், குத்துச்சண்டை, கையுந்து பந்து, கால்பந்து, பளு தூக்குதல் மற்றும் ஜூடோ ஆகிய விளையாட்டுக்களும், மாணவிகளுக்கான வேலூர் மாவட்டத்தில் காட்பாடியில் உள்ள சிறப்பு விளையாட்டு விடுதியில் கூடைப்பந்து, கைப்பந்து, ஹாக்கி மற்றும் கபடி விளையாட்டுக்களும் உள்ளது.

ஆன்லைன் மூலம் விண்ணப்பிக்கலாம்

1.1.2023 அன்று 17 வயது நிரம்பிய 12-ம் வகுப்பில் தேர்ச்சி பெற்ற கல்லூரியில் இளநிலை மற்றும் முதுநிலை பயிலும் மாணவ, மாணவிகள் இதில் சேர தகுதியுடையவர் ஆவார்கள். தனிநபா் மற்றும் குழு விளையாட்டு போட்டிகளில் விண்ணப்பிப்பவர்கள் மாநில அளவில் குடியரசு பாரதியார் தின விளையாட்டு போட்டிகள் அங்கீகரிக்கப்பட்ட மாநில விளையாட்டு கழகங்கள் நடத்தும் போட்டிகளில் முதல் மூன்று இடங்களில் வெற்றி பெற்றிருத்தல் வேண்டும். அல்லது தமிழ்நாடு அணியில் தேர்வு செய்யப்பட்டு, தேசிய அளவில் தேசிய விளையாட்டு சம்மேளனங்கள், இந்திய பள்ளி விளையாட்டு கூட்டமைப்பு கழகங்கள் இந்திய விளையாட்டு அமைச்சகம் நடத்தும் போட்டிகளில் கலந்து கொண்டவர்களும் விண்ணப்பிக்கலாம்.

விளையாட்டில் சிறந்து விளங்கும் மற்றும் ஆர்வம் கொண்டுள்ள மாணவ, மாணவிகள் சிறப்பு விளையாட்டு விடுதி சேர்க்கைக்கான ஆன்லைன் விண்ணப்ப படிவத்தினை www.sdat.tn.gov.in என்ற இணையதள முகவரியில் விண்ணப்பிக்கலாம். ஆன்லைன் விண்ணப்பத்தினை பூர்த்தி செய்வதற்கான கடைசி நாள் 1.5.2023 அன்று மாலை 5 மணி வரை ஆகும். ஆன்லைன் விண்ணப்பங்கள் மட்டுமே ஏற்றுக்கொள்ளப்படும். இவ்வாறு அதில் கூறப்பட்டுள்ளது.