போதை பழக்கத்துக்கு எதிரான உறுதிமொழி ஏற்பு நிகழ்ச்சி

உடுமலை உட்கோட்ட போலீஸ் சரக பகுதியில் போதை பழக்கத்துக்கு எதிரான உறுதிமொழி ஏற்பு நிகழ்ச்சி நேற்று நடந்தது.

உறுதிமொழி ஏற்பு நிகழ்ச்சி

போதை பழக்கத்திற்கு எதிரான உறுதிமொழி ஏற்பு நிகழ்ச்சி நேற்று தமிழ்நாடு முழுவதும் நடைபெற்றது. அந்த வகையில் பள்ளி, கல்லூரிகளில் நிகழ்ச்சி நடைபெற்றது. திருப்பூர் மாவட்ட தாராபுரம் மதுவிலக்கு அமலாக்கப் பிரிவு சார்பாக உடுமலை அரசு கலைக்கல்லூரியில் போதைப் பழக்கத்திற்கு எதிரான உறுதிமொழி ஏற்பு நிகழ்ச்சி நேற்று நடைபெற்றது. நிகழ்ச்சிக்கு உடுமலை துணை போலீஸ் சூப்பிரண்டு ஜெ.சுகுமாறன் தலைமை தாங்கினார்.

கல்லூரி முதல்வர் சோ.கி.கல்யாணி முன்னிலை வகித்தார். இதையடுத்து துணை போலீஸ் சூப்பிரண்டு சுகுமாறன், போலீஸ் இன்ஸ்பெக்டர் ராஜா கண்ணன் (தளி), போதை ஒழிப்பு விழிப்புணர்வு இயக்க ஒருங்கிணைப்பாளர் விஜய் ஆனந்த் ஆகியோர் போதை பொருட்களால் ஏற்படும் விளைவுகள் குறித்து மாணவர்கள் மத்தியில் விரிவாக எடுத்து உரைத்தனர். அதைத்தொடர்ந்து காணொலி வாயிலாக முதல்-அமைச்சர் மு.க.ஸ்டாலின் உறுதிமொழி வாசிக்க அனைவரும் உறுதிமொழி ஏற்றுக்கொண்டனர்.

விழிப்புணர்வு பேரணி

பின்னர் விழிப்புணர்வு பேரணி நடைபெற்றது. இதில் என்.சி.சி, கல்லூரி மாணவர்கள், போலீசார் கலந்து கொண்டு விழிப்புணர்வு பதாகையை ஏந்தியவாறு சென்றனர். பேரணி கல்லூரியில் இருந்து உடுமலை திருமூர்த்திமலை சாலையை சென்றடைந்து திரும்பி மீண்டும் கல்லூரியில் நிறைவடைந்தது. அப்போது பொதுமக்களுக்கு துண்டு பிரசுரங்கள் மூலமாக விழிப்புணர்வும் ஏற்படுத்தப்பட்டது. இதில் சப்-இன்ஸ்பெக்டர்கள் சிவராஜ் (சட்டம் ஒழுங்கு), சந்திரமவுலி (மதுவிலக்கு) உள்ளிட்ட போலீசார் மாணவர்கள் கலந்துகொண்டனர்.

பாரதியார் நூற்றாண்டு அரசு பெண்கள் மேல்நிலைப் பள்ளியில் தலைமை ஆசிரியர் ப.விஜயா தலைமையில் உறுதிமொழி ஏற்பு நிகழ்ச்சி நடைபெற்றது. இதில் ஆசிரியர்கள் ராசேந்திரன், கார்த்திகா உள்ளிட்ட மாணவர்கள் கலந்துகொண்டனர்.

32 இடங்களில்

இதே போன்று உடுமலை உட்கோட்ட போலீஸ் சரகத்திற்கு உட்பட்ட உடுமலை, குடிமங்கலம், மடத்துக்குளம், கொமரலிங்கம், தளி, அமராவதிநகர், கணியூர் உள்ளிட்ட போலீஸ் சரக பகுதியில் போதை ஒழிப்பு விழிப்புணர்வு சம்பந்தமான ஒளிபரப்பு நிகழ்ச்சி, விழிப்புணர்வு நாடகம், பேரணி, உறுதிமொழி ஏற்பு நிகழ்ச்சி 32 இடங்களில் நடைபெற்றது.

இந்தப் பகுதியில் உள்ள பள்ளி, கல்லூரிகளில் இன்ஸ்பெக்டர்கள், சப்-இன்ஸ்பெக்டர்கள், போலீசார் கலந்து கொண்டு மாணவர்களுக்கு போதை பொருட்கள் பழக்கத்தினால் ஏற்படும் விளைவுகள் குறித்து எடுத்துக்கூறியதுடன் துண்டு பிரசுரங்கள் மூலமாக விழிப்புணர்வையும் ஏற்படுத்தினார்கள். அதைத் தொடர்ந்து ஆசிரியர்கள் மாணவர்களுடன் சேர்ந்து உறுதிமொழி ஏற்றுக்கொண்டனர்.