மோட்டார் சைக்கிள்கள் மோதல்; 2 பேர் பலி

ஆம்பூர்

ஆம்பூர் அருகே மோட்டார் சைக்கிள்கள் மோதிக்கொண்ட விபத்தில் 2 பேர் பலியாகினர்.

மோட்டார் சைக்கிள்கள் மோதல்

பேரணாம்பட்டு அடுத்த மாச்சம்பட்டு பகுதியை சேர்ந்தவர் சீனிவாசன் (வயது 33), விவசாயி. இவர் தனது தங்கை குழந்தைகள் சிவன்யா (6) ரக்ஷனா (7) ஆகியோரை மாச்சம்பட்டு பகுதியில் உள்ள டியூஷன் மையத்தில் இருந்து மோட்டார்சைக்கிளில் அழைத்துக் கொண்டு வீட்டிற்கு சென்றார்.

பேரணாம்பட்டு சாலையில் சென்றபோது எதிரே வந்த மோட்டார் சைக்கிள் மீது எதிர்பாராத விதமாக சீனிவாசன் ஓட்டி வந்த மோட்டார் சைக்கிள் நேருக்கு நேர் மோதியது.

2 பேர் பலி

இதில் எதிர்திசையில் வந்த வாணியம்பாடியை அடுத்த மாரப்பட்டு பகுதியை சேர்ந்த ரிஸ்வான் (48) என்பவர் சம்பவ இடத்திலேயே பரிதாபமாக இறந்தார். அவருடன் வந்த வாணியம்பாடி தாலுகா மேட்டுப்பாளையம் பகுதியை சேர்ந்த அருண் (40), மாச்சம்பட்டை சேர்ந்த சீனிவாசன், சிவன்யா, ரக்ஷனா ஆகிய 4 பேரும் படுகாயம் அடைந்தனர். இது குறித்து தகவலறிந்ததும் உமராபாத் போலீசார் சம்பவ இடத்திற்கு விரைந்து சென்று படுகாயம் அடைந்த அருண், சீனிவாசன் உள்ளிட்ட 4 பேரை மீட்டு சிகிச்சைக்காக பேரணாம்பட்டு அரசு மருத்துவமனைக்கு அனுப்பி வைத்தனர்.

அவர்களில் அருண் சிகிச்சை பலனின்றி இறந்தார். இதுகுறித்து உமராபாத் போலீசார் விசாரணை நடத்தி வருகின்றனர்.