மோட்டார் சைக்கிள்கள் மோதல்; தொழிலாளி சாவு

தக்கலை:

குலசேகரம் அருகே உள்ள தும்பகோடு பகுதியை சேர்ந்தவர் மகிபால் (வயது 53). இவர் அழகியமண்டபத்தில் உள்ள ஒரு தனியார் மதுபான பாரில் வேலை பார்த்து வந்தார். நேற்று முன்தினம் இரவு மகிபால் வேலை முடிந்து வீட்டுக்கு தனது மோட்டார் சைக்கிளில் தும்பகோடு நோக்கி திரும்பிக் கொண்டிருந்தார். மேக்காமண்டபத்தை அடுத்த அடர்காட்டுவிளை பகுதியில் வந்தபோது எதிரே வந்த மற்றோரு மோட்டார் சைக்கிள் மோதியது. இதில் மகிபால் தூக்கி வீசப்பட்டு படுகாயமடைந்தார். மற்றொரு மோட்டார் சைக்கிளில் வந்த அருமனையை சேர்ந்த ரவிச்சந்திரன்(48), அவரது மகள் அபர்ணா(14) ஆகியோரும் காயமடைந்தனர். அக்கம் பக்கத்தினர் உடனே அவரை மீட்டு சிகிச்சைக்காக ஆசாரிபள்ளம் அரசு ஆஸ்பத்திரிக்கு அனுப்பி வைத்தனர். அங்கு மகிபாலுக்கு தீவிர சிகிச்சை அளித்தும் பலனின்றி நேற்று காலை பரிதாபமாக இறந்தார். இதுகுறித்த புகாரின் பேரில் ரவிச்சந்திரன் மீது கொற்றிகோடு போலீசார் வழக்குபதிவு செய்து விசாரணை நடத்தி வருகிறார்கள்.