புகார் பெட்டி

தினத்தந்தி புகார் பெட்டிக்கு 8939078888 என்ற வாட்ஸ்- அப் எண்ணில் வந்துள்ள மக்கள் குறைகள் தொடர்பான பதிவுகள் வருமாறு:-

சேதமடைந்த சாலை

மதுரை 94-வது வார்டு எம்.எம்.சி. காலனி பகுதியில் குடிநீர் குழாய் பதிப்பதற்காக சாலைகள் தோண்டப்பட்டு மிகவும் மோசமான நிலையில் காட்சியளிக்கிறது. மழை காலங்களில் சாலையில் பயணிப்பது மிகுந்த சவாலாகவே உள்ளது. மேலும் வாகனஓட்டிகள் அவ்வப்போது விபத்தில் சிக்கும் அபாயம் உள்ளது. எனவே சாலையை சீரமைக்க நடவடிக்கை எடுக்க வேண்டும்.

செந்தில், மதுரை.

தொல்லை தரும் தெரு நாய்கள்

மதுரை பந்தடி தெரு பகுதிகளில் நாய்கள், குரங்குகள் தொல்லை நாளுக்கு நாள் அதிகரித்து வருகிறது. இவை சாலையில் செல்பவர்களை அச்சுறுத்துவதால் பொதுமக்கள் மிகுந்த சிரமத்திற்கு ஆளாவதுடன் வீட்டிலேயே முடங்கும் நிலை ஏற்பட்டுள்ளது. எனவே சம்பந்தப்பட்ட துறையினர் நாய், குரங்குகளை அகற்ற நடவடிக்கை எடுக்க வேண்டும்.

கண்ணன், மதுரை

கூடுதல் பஸ் இயக்கப்படுமா?

மதுரை மாவட்டம் பெரியார் பஸ் நிலையத்தில் இருந்து காளவாசல் வழியாக செல்லும் மேலக்கால் மெயின்ரோடு, குருவித்துறை, மன்னடிமங்கலம், துவரிமான், கோச்சடை வழித்தடத்தில் குறிப்பிட்ட அளவே பஸ்கள் இயக்கப்படுகின்றன. இதனால் இந்த வழியாக பயணிக்கும் பயணிகள் நீண்ட நேரம் காத்திருந்து பயணிக்க வேண்டிய நிலை ஏற்பட்டுள்ளது. எனவே இந்த வழித்தடத்தில் கூடுதல் பஸ் இயக்க நடவடிக்கை எடுக்க வேண்டும்.

ராஜன், துவரிமான்.

ஆக்கிரமிக்கப்பட்ட கால்வாய்

மதுரை மாவட்டம் ஆலங்குளம் கோசாகுளம் சாலையில் ஆனந்த நகர் பகுதியில் நீர்வழி கால்வாயை சிலர் ஆக்கிரமித்துள்ளனர். மேலும் கால்வாயில் இறைச்சி கழிவுகளை கொட்டுகின்றனர். இதனால் கால்வாய் பகுதிகள் சுகாதார சீர்கேடு காணப்படுகிறது. எனவே இதற்கு அதிகாரிகள் தகுந்த நடவடிக்கை எடுக்க வேண்டும்.

சத்தியமூர்த்தி, கோசாகுளம்.

சுகாதார சீர்கேடு

மதுரை அண்ணாநகர் செந்தில்நாதன் தெருவில் உள்ள சாலையில் கழிவுநீர் தேங்கி காணப்படுகிறது. இதனால் சாலையில் நடக்க, வாகனங்களில் பயணிக்க முடியாமல் பொதுமக்கள் அவதியடைகின்றனர். மேலும் தேங்கிய கழிவுநீரால் இப்பகுதி முழுவதும் சுகாதார சீர்கேடு ஏற்படுகிறது. எனவே கழிவுநீரை அகற்ற நடவடிக்கை எடுக்க வேண்டும்.

லலிதா, அண்ணாநகர்.