புகார் பெட்டி

தினத்தந்தி புகார் பெட்டிக்கு 8939078888 என்ற வாட்ஸ்- அப் எண்ணில் வந்துள்ள மக்கள் குறைகள் தொடர்பான பதிவுகள் வருமாறு:-

சாலை சரி செய்யப்படுமா?

ராமநாதபுரம் மாவட்டம் புதுமடம் இந்தியன் ஓவர்சீஸ் வங்கி சாலை மிகவும் மோசமான நிலையில் உள்ளது. இதனால் இந்த சாலையில் வாகனங்களை இயக்க முடியாமல் வாகனஓட்டிகள் மிகவும் சிரமப்படுகிறார்கள். எனவே இந்த சாலையை சீரமைக்க நடவடிக்கை எடுக்கப்படுமா?

நிறுத்தப்பட்ட ரெயில்கள் இயக்கப்படுமா?

ராமநாதபுரம் மாவட்டம் ராமேசுவரத்தில் இருந்து அகல ரெயில் பாதையாக மாற்றம் செய்வதற்கு முன்பாக ராமேசுவரம்- கோயம்புத்தூர் இடையே தினசரி ரெயில் இயக்கப்பட்டது. இந்த ரெயில் ராமேசுவரம் வரும் பக்தர்களுக்கு மிகவும் பயனுள்ளதாக இருந்தது. இந்த ரெயில் தற்போது நிறுத்தப்பட்டுள்ளது. எனவே இந்த வழித்தடத்தில் தினசரி ரெயில் மீண்டும் இயக்க ரெயில்வே நிர்வாகம் நடவடிக்கை எடுக்க வேண்டும்.

வாகன ஓட்டிகள் அவதி

ராமநாதபுரம் மாவட்டத்தின் சாலைகளில் வாகன ஓட்டிகளை அச்சுறுத்தும் வகையில் சிலர் அதிக ஒலி எழுப்பும் ஒலிப்பான்களை தங்களது வாகனங்களில் பயன்படுத்தி வருகின்றனர். இதனால் பிற வாகன ஓட்டிகள் அவதிக்குள்ளாகின்றனர். எனவே பொதுமக்கள் மற்றும் வாகன ஓட்டிகளை அச்சுறுத்தும் வகையில் வாகனங்களில் பயன்படுத்தப்படும் அதிக ஒலி எழுப்பும் ஒலிப்பான்களை அகற்ற நடவடிக்கை எடுக்க வேண்டும்.

சாலை சீரமைக்கப்படுமா?

ராமநாதபுரம் மாவட்டம் பரமக்குடி நகர் சுற்றுவட்டார கிராமங்களுக்கு செல்லும் சாலை சில இடங்களில் சேதமடைந்து காணப்படுகிறது. இதனால் வாகன ஓட்டிகள் விபத்தில் சிக்கும் அபாயமும் உள்ளது. எனவே இந்த சாலையை சீரமைக்க அதிகாரிகள் நடவடிக்கை எடுக்க வேண்டும்.

நடவடிக்கை தேவை

ராமநாதபுரம் மாவட்டம் ஆர்.எஸ். மங்கலம் பகுதியில் தெரு நாய்கள் அதிக அளவில் சுற்றித்திரிகின்றன. இதனால் பொதுமக்கள் இரவு நேரங்களில் வெளியே செல்ல மிகவும் அச்சப்படுகின்றனர். மேலும் இந்த நாய்களால் ரேபிஸ் போன்ற கொடிய நோய்கள் பரவவும் வாய்ப்பு உள்ளது. எனவே இதுகுறித்து சம்பந்தப்பட்ட அதிகாரிகள் நடவடிக்கை எடுக்க வேண்டும்