ஊரக உள்ளாட்சி தற்செயல் தேர்தல் தொடர்பான புகார்களை கட்டுப்பாட்டு அறைக்கு தெரிவிக்கலாம்

அரியலூர் மாவட்டத்தில் ஊரக உள்ளாட்சி அமைப்புகளில் காலியாக உள்ள அரியலூர் ஒன்றிய ரெட்டிப்பாளையம் கிராம ஊராட்சி தலைவர் பதவி, ஆண்டிமடம் ஒன்றிய இடையக்குறிச்சி ஊராட்சி 7-வது வார்டு உறுப்பினர் பதவி, சிலம்பூர் ஊராட்சி 1-வது வார்டு உறுப்பினர் பதவி, ஜெயங்கொண்டம் ஒன்றிய கழுவந்தோண்டி ஊராட்சி 6-வது வார்டு உறுப்பினர் பதவி, மேலணிக்குழி ஊராட்சி 7-வது வார்டு உறுப்பினர் பதவி, செந்துறை ஒன்றிய நாகல்குழி ஊராட்சி 1-வது வார்டு உறுப்பினர் பதவி, துளார் ஊராட்சி 6-வது வார்டு உறுப்பினர் பதவி, தா.பழூர் ஒன்றிய சாத்தம்பாடி ஊராட்சி 7-வது வார்டு உறுப்பினர் பதவி, தென்கட்சி பெருமாள்நத்தம் ஊராட்சி 4-வது வார்டு உறுப்பினர் பதவி, திருமானூர் ஒன்றிய கீழக்காவாட்டாங்குறிச்சி ஊராட்சி 6-வது வார்டு உறுப்பினர் பதவி ஆகிய பதவிகளுக்கு ஜூலை மாதம் 9-ந்தேதி தற்செயல் தேர்தல் நடைபெறவுள்ளது. அந்த தேர்தலுக்கான வேட்பு மனு தாக்கல் கிராம ஊராட்சி தலைவர் பதவிக்கு ஒன்றிய அலுவலகத்திலும், ஊராட்சி வார்டு உறுப்பினர் பதவிக்கு, அந்தந்த ஊராட்சி மன்ற அலுவலகத்திலும் கடந்த 20-ந்தேதி தொடங்கி நடைபெற்று வருகிறது. ஏற்கனவே கழுவந்தோண்டி ஊராட்சி 6-வது வார்டு உறுப்பினர் பதவிக்கு பெண் ஒருவரும், சாத்தம்பாடி ஊராட்சி 7-வது வார்டு உறுப்பினர் பதவிக்கு 2 பெண்களும், வேட்பு மனு தாக்கல் செய்திருந்தனர்.

இந்த நிலையில் கீழக்காவாட்டாங்குறிச்சி ஊராட்சி 6-வது வார்டு உறுப்பினர் பதவிக்கு போட்டியிட பெண் ஒருவரும், மேலணிக்குழி ஊராட்சி 7-வது வார்டு உறுப்பினர் பதவிக்கு ஆண் ஒருவரும், கழுவந்தோண்டி ஊராட்சி 6-வது வார்டு உறுப்பினர் பதவிக்கு பெண் ஒருவரும் நேற்று வேட்பு மனு தாக்கல் செய்தனர். வேட்பு மனு தாக்கல் செய்ய கடைசி நாள் வருகிற 27-ந்தேதி ஆகும். மேலும் அரியலூர் மாவட்டத்தில் ஊரக உள்ளாட்சி தற்செயல் தேர்தல் தொடர்பான புகார்களை கலெக்டர் அலுவலகத்தில் கட்டுப்பாட்டு அறையின் 04329- 228902 என்ற தொலைபேசி எண்ணில் தெரிவிக்கலாம் என அறிவிக்கப்பட்டு உள்ளது.