பஸ்சில் இருந்து தவறி விழுந்த கட்டிட தொழிலாளி சாவு

மணவாளக்குறிச்சி:

மண்டைக்காடு அருகே உள்ள அழகன்பாறை காளிவிளையை சேர்ந்தவர் ஜாண்ஜோசப் ராஜ் (வயது60), கட்டிட தொழிலாளி. இவர் நேற்று முன்தினம் மூத்தாருண்ணி பகுதியில் இருந்து திங்கள்சந்தைக்கு செல்வதற்காக அரசு பஸ்சில் ஏறி பயணம் செய்தார். அப்போது பஸ்சின் பின் இருக்கையில் இருந்த அவர் முன் இருக்கைக்கு இடம் மாறினார். இதில் எதிர்பாராத விதமாக பின்பக்க படிக்கட்டின் வழியாக கீழே தவறி விழுந்தார். இதில் தலையில் பலத்த காயமடைந்த அவர் அலறினார். இதைகண்டு அதிர்ச்சி அடைந்த கண்டக்டர் முத்துக்குமார் உடனே விசில் அடித்து பஸ்சை நிறுத்தினர். பின்னர், அக்கம் பக்கத்தினர் உதவியுடன் படுகாயமடைந்த ஜாண்ஜோசப்ராஜை மீட்டு சிகிச்சைக்காக ஆசாரிபள்ளம் அரசு ஆஸ்பத்திரியில் சேர்த்தனர். அங்கு தீவிர சிகிச்சை அளித்தும் பலனின்றி நேற்று காலையில் ஜாண்ஜோசப் ராஜ் பரிதாபமாக இறந்தார். இந்த சம்பவம் குறித்து மண்டைக்காடு போலீசார் வழக்குப்பதிவு செய்து விசாரணை நடத்தி வருகிறார்கள்.