கொங்கணாபுரம் கூட்டுறவு சங்கத்தில்ரூ.1.35 கோடிக்கு பருத்தி ஏலம்

எடப்பாடி

கொங்கணாபுரம் கூட்டுறவு சங்கத்தில் நேற்று பருத்தி, எள் ஏலம் நடந்தது. இதில், சேலம் மற்றும் அண்டை மாவட்டத்தின் பல்வேறு பகுதிகளில் இருந்து விவசாயிகள் விற்பனைக்காக கொண்டு வரும் பருத்தி, நிலக்கடலை, எள், தேங்காய் பருப்பு உள்ளிட்ட விளை பொருட்கள் விற்பனை செய்யப்பட்டு வருகிறது. நேற்று நடைபெற்ற பொது ஏலத்தில் விற்பனைக்கு கொண்டு வரப்பட்ட 5,500 பருத்தி மூட்டைகள் 675 லாட்டுகளாக பிரிக்கப்பட்டு பொது ஏலம் விடப்பட்டது. இதில் பி.டி. ரக பருத்தியானது குவிண்டால் ஒன்றுக்கு (100 கிலோ) ரூ.5 ஆயிரத்து 789 முதல் ரூ.6 ஆயிரத்து 789 வரை விற்பனையானது.

இந்த மையத்தில் நாள் முழுவதும் நடைபெற்ற பொது ஏலத்தின் மூலம் ரூ.1 கோடியே 35 லட்சம் மதிப்பிலான பருத்தி ஏலம் போனது. தொடர்ந்து எள் பொது ஏலம் நடைபெற்றது. இதில் வெள்ளை ரக எள் கிலோ ஒன்று ரூ.127 முதல் ரூ.161.20 வரையிலும், சிவப்பு ரகம் கிலோ ஒன்று ரூ.123.20 முதல் ரூ.163.20 வரையும் விற்பனையானது. ஏலத்தில் விவசாயிகள் விற்பனைக்கு கொண்டு வந்திருந்த 250 மூட்டை எள் ரூ.25 லட்சத்துக்கு ஏலம் போனது.