தினத்தந்தி புகார் பெட்டி

சுகாதார சீர்கேடு

பெரம்பலூர் நகராட்சி அலுவலகம் அருகே புதிய பஸ் நிலையம் உள்ளது. இங்குள்ள சென்னை பஸ் நிறுத்தம் அருகே காலியாக இடம் ஒன்று உள்ளது. அந்த இடத்தில் இரவு நேரங்களில் பலர் சிறுநீர் கழித்து வருகின்றனர். இதனால் அப்பகுதியில் சுகாதார சீர்கேடு ஏற்ட்டு நோய் பரவும் அபாயம் உள்ளது. எனவே சம்பந்தப்பட்ட அதிகாரிகள் இதுகுறித்து நடவடிக்கை எடுக்க வேண்டும் என கேட்டுக் கொள்கிறோம்.

பொதுமக்கள், பெரம்பலூர்.

பாலப்பணியை விரைந்து முடிக்க கோரிக்கை

பெரம்பலூர் மாவட்டம், குன்னம் அருகே வேப்பூரில் இருந்து புதுவேட்டக்குடி செல்லும் சாலையில் கருங்குளம் அருகே புதிதாக உயர்மட்ட மேம்பாலம் கட்டப்பட்டு வருகிறது. இந்த பணி கடந்த 6 மாதங்களாக மந்தமாக நடந்து வருகிறது. தற்போது அப்பகுதியில் மழை பெய்து வருவதால் போக்குவரத்திற்கு இடையூறு ஏற்பட்டு வருகிறது. எனவே பாலப்பணிகளை விரைந்து முடிந்து பொதுமக்களின் பயன்பாட்டிற்கு விட வேண்டும் என அப்பகுதி பொதுமக்கள் கோரிக்கை விடுத்துள்ளனர்.

பொதுமக்கள், குன்னம்.

விபத்தில் சிக்கும் வாகனங்கள்

பெரம்பலூர் மாவட்டம், ஆலத்தூர் தாலுகா, நாட்டார்மங்கலம் மாரியம்மன் கோவில் தெருவில் ஊராட்சி ஒன்றிய நடுநிலைப்பள்ளி உள்ளது. இந்த பள்ளி முதல் பாலகட்டை வரை உள்ள சிமெண்டு சாலை கடந்த சில ஆண்டுகளுக்கு முன்பு போடப்பட்டது. தற்போது சாலை குண்டும், குழியுமாக போக்குவரத்திற்கு லாயகற்று காணப்படுகிறது. மேலும் சில நேரங்களில் இருசக்கர வாகனங்களில் வருபவர்கள் கீழே விழுந்து விபத்தில் சிக்கி வருகின்றனர். மேலும் சைக்கிளில் செல்லும் மாணவ-மாணவிகளும் கீழே விழுந்து விடுகின்றனர். எனவே சம்பந்தப்பட்ட அதிகாரிகள் இதுகுறித்து நடவடிக்கை எடுக்க வேண்டும் என கேட்டுக் கொள்கிறோம்.

பொதுமக்கள், நாட்டார்மங்கலம்.

கழிவறை வசதி வேண்டும்

பெரம்பலூர் மாவட்டம், லாடபுரத்தில் ஏராளமான பொதுமக்கள் வசித்து வருகின்றனர். இங்கு கழிவறை வசதி இல்லாததால் அனைத்து தரப்பினரும் ஊரின் மையப்பகுதியில் உள்ள திறந்த வெளியில் மலம் கழிக்கிறது. இதனால் அந்த பகுதியில் கடும் துர்நாற்றம் வீசுவதுடன் நோய் பரவும் அபாயம் ஏற்பட்டுள்ளது. எனவே சம்பந்தப்ட்ட அதிகாரிகள் உடனடியாக கழிவறை வசதி ஏற்படுத்தி தர நடவடிக்கை எடுக்க வேண்டும் என கேட்டு கொள்கிறோம்.

பொதுமக்கள், லாடபுரம்.

கூடுதல் பஸ் இயக்க கோரிக்கை

பெரம்பலூர் பழைய பஸ் நிலையத்தில் இருந்து மாலை 5 மணிக்கும், இரவு 7 மணிக்கும் செங்குணம், சிறுகுடல், கீழப்புலியூர் வழியாக பொண்ணகரம் வரை இயக்கப்படும் அரசு பஸ்களில் பள்ளி, கல்லூரி, ஐடிஐ, பாலிடெக்னிக் மாணவர்கள், வெளியூருக்கு வேலைக்கு சென்று வரும் பெண்கள் என கூட்டம் அதிகமாக உள்ளது. இதனால் சிலர் படியில் தொங்கியபடி ஆபத்தான பயணம் மேற்கொண்டு வருகின்றனர். எனவே பொதுமக்களின் நலன் கருதி இந்த வழிதடத்தில் மாலை 5 மணிக்கும், இரவு 7 மணிக்கும் இடையில் கூடுதல் பஸ் இயக்க சம்பந்தப்பட்ட போக்குவரத்து அதிகாரிகள் நடவடிக்கை எடுக்க வேண்டும் என கேட்டுக் கொள்கிறோம்.

குமார் அய்யாவு, செங்குணம்.