பதவி உயர்வு கலந்தாய்வை நடத்தக்கோரி பொது சுகாதாரத்துறை அலுவலர்கள் ஆர்ப்பாட்டம்

சுகாதார ஆய்வாளர்கள் பதவி உயர்வு கலந்தாய்வை உடனடியாக நடத்த வேண்டும் என்பது உள்பட பல்வேறு கோரிக்கைகளை வலியுறுத்தி சேலம் மாவட்ட பொது சுகாதாரத்துறை அலுவலர் சங்கம் சார்பில் சேலத்தில் நேற்று மாலை ஆர்ப்பாட்டம் நடைபெற்றது. மாவட்ட சுகாதார பணிகள் துணை இயக்குனர் அலுவலகம் முன்பு நடந்த இந்த ஆர்ப்பாட்டத்திற்கு மாவட்ட தலைவர் பிரபாகரன் தலைமை தாங்கினார். மாவட்ட துணைத்தலைவர் செல்வகுமார், மாவட்ட இணை செயலாளர் பன்னீர்செல்வம், மாநில துணைத்தலைவர் செல்வம் உள்பட சுகாதாரத்துறை அலுவலர்கள் பலர் கலந்து கொண்டனர்.

இந்த ஆர்ப்பாட்டத்தின்போது, சுகாதார ஆய்வாளர்கள் பதவி உயர்வு கலந்தாய்வை உடனடியாக நடத்த வேண்டும், சுகாதார ஆய்வாளர்களின் ஊதியத்தை ரூ.20 ஆயிரமாக உயர்த்தி வழங்க வேண்டும், காலியாக உள்ள சுகாதார ஆய்வாளர் நிலை-2 பணியிடங்களை நிரப்ப வேண்டும் என்பன உள்பட பல்வேறு கோரிக்கைகளை வலியுறுத்தி கோஷங்கள் எழுப்பப்பட்டன.