சிவகாசி யூனியனில் வளர்ச்சி பணிகள்

சிவகாசி,

சிவகாசி யூனியன் பகுதிகளில் நடைபெற்று வரும் வளர்ச்சி பணிகளை கலெக்டர் மேகநாதரெட்டி ஆய்வு செய்தார்.

வீடு வழங்கும் திட்டம்

சிவகாசி யூனியன் ஆனையூர் ஊராட்சியில் உள்ள சமத்துவபுரம் பகுதிகளில் புதுப்பிக்கப்பட்டுள்ள வீடுகளை கலெக்டர் மேகநாதரெட்டி பார்வையிட்டு ஆய்வு செய்தார். செங்கமலநாச்சியார்புரம் பகுதியில் ரூ.22 லட்சம் மதிப்பில் ஊருணி சீரமைக்கப்பட்டு வரும் பணிகளையும் மற்றும் அதே பகுதியில் ரூ.12 லட்சம் மதிப்பில் அமைக்கப்பட்டுள்ள பேவர் பிளாக் சாலையையும் கலெக்டர் ஆய்வு செய்தார்.

அதனை தொடர்ந்து நமஸ்கரித்தான்பட்டியில் நடைபெற்று வரும் பாரதப்பிரதமரின் வீடு வழங்கும் திட்டத்தின் கீழ் கட்டப்பட்டு வரும் வீடுகளை கலெக்டர் ஆய்வு செய்தார்.

கலெக்டர் ஆய்வு

இதேபோல் மங்களம் ஊராட்சி மேட்டுப்பட்டியில் ரூ.49 லட்சம் மதிப்பில் சிறிய பாலம் கட்டுப்பட்டு வரும் பணிகளையும், புதுக்கோட்டை ஊராட்சியில் ரூ.24 லட்சம் மதிப்பில் கட்டப்பட்டு வரும் ஊராட்சி மன்ற அலுவலகக் கட்டிடப்பணிகளையும் பார்வையிட்டு ஆய்வு செய்தார். மேலும், செவலூர் ஊராட்சியில் உள்ள இலங்கை அகதிகள் முகாமில் ரூ.3 கோடியே 11 லட்சம் மதிப்பில் வீடுகள் கட்டப்பட்டு வரும் பணிகளையும் கலெக்டர் ஆய்வு செய்தார்.

ஆய்வின்போது திட்ட இயக்குனர் திலகவதி, உதவி செயற்பொறியாளர் பாண்டுரங்கன், வட்டார வளர்ச்சி அலுவலர்கள் சீனிவாசன், ராமமூர்த்தி, பஞ்சாயத்து தலைவர்கள், செயலர்கள் மற்றும் பலர் உடனிருந்தனர்.